வலிமை கதையில் அஜித் செய்ய சொன்ன மாற்றம்! பெண்களை கவர புது பிளான்

தல அஜித்திற்கு தமிழ் சினிமாவில் அதிக அளவில் வெறித்தனமான ரசிகர்கள் இருக்கிறார்கள். அவரது படங்களை தியேட்டர்களில் கொண்டாடும் ரசிகர்கள் அதிகம் இருந்தாலும் குடும்ப ரசிகர்களை ஈர்க்கும் அளவுக்கு அவரது படங்கள் இருந்தால் மட்டுமே ஃபேமிலி ஆடியன்ஸ் தியேட்டர்களுக்கு அதிகம் வருவார்கள். அஜித்தின் முந்தைய படமான விஸ்வாசம் படத்தில் அப்பா மகள் சென்டிமென்ட் இருந்ததால் மிகப் பெரிய அளவில் அது ரசிகர்களை ஈர்த்தது. இந்த படத்தினை அஜித்தின் வெறித்தனமான ரசிகர்கள் மட்டுமின்றி குடும்ப ரசிகர்களும் அதிக அளவில் தியேட்டர்களுக்கு வந்து ரசித்தார்கள்.

அது போல தன்னுடைய அடுத்த படமான வலிமை படத்தில் குடும்ப ரசிகர்களை குறிப்பாக பெண்களை கவரும் வகையில் ஏதாவது இருக்க வேண்டும் என அஜித் நினைக்கிறாராம். அதற்காக படத்தில் சில மாற்றங்களை செய்யும் படி அஜித் இயக்குனர் வினோத் இடம் கூறி இருக்கிறார் என்றும் தெரிகிறது.

கொரோனா காரணமாக நிறுத்தப்பட்டிருந்த வலிமை படத்தின் ஷுட்டிங் சென்ற வாரம் சென்னை ரெட் ஹில்ஸ் பகுதியில் துவங்கியது குறிப்பிடத்தக்கது. அதில் அஜித்துக்கு வில்லனாக நடிக்கும் கார்த்திகேயா ஷூட்டிங்கில் கலந்து கொண்டார். அவரது புகைப்படங்கள் வெளியாகி இணையத்தில் வைரலாகி இருந்தது.

இந்த படத்தில் போலீஸ் அதிகாரியாக அஜித் நடிக்கும் நிலையில், பெண்களை கவரும் வகையில் சில விஷயங்களை சேர்க்க வினோத் தற்போது பணியாற்றி வருகிறாராம். பல மாதங்களுக்குப் பிறகு ஷூட்டிங் தற்போது மீண்டும் தொடங்கியிருக்கும் நிலையில். அடுத்த வருடம் கோடை விடுமுறைக்கு படம் திரைக்கு வரும் என எதிர்பார்க்கப்படுகிறது.

நேர்கொண்ட பார்வை படத்தை தொடர்ந்து போனி கபூர் இந்த படத்தை தயாரித்து வருகிறார். மிகப் பிரமாண்ட பட்ஜெட்டில் அவர் இதனை தயாரிக்கிறார். வலிமை படத்தின் முக்கிய காட்சிகளை வெளிநாட்டில் படமாக்க இயக்குனர் திட்டமிட்டு இருந்த நிலையில் கொரோனா காரணமாக அதனை இந்தியாவிலேயே படமாக்க இருக்கிறார்கள் என்று கூறப்படுகிறது.

அஜித் நிஜ வாழ்க்கையிலேயே பைக் மற்றும் கார் ரேஸ் மீது அதிக ஈடுபாடு கொண்டவர். அதே போல வலிமை படத்திற்காக திரையிலும் அவர் பைக் மற்றும் கார் ரேஸ் மீது ஈடுபாடு கொண்டவராக நடிக்கிறார் என்றும் கூறப்பட்டு வருகிறது. மேலும் இந்தப் படத்தில் அஜித்துக்கு ஜோடியாக நடிக்கும் ஹுமா குரேஷிக்கும் மிக முக்கிய கதாப்பாத்திரம் என கூறப்படுகிறது. அவருக்கும் பைக் ஸ்டண்ட் காட்சிகள் இருக்கிறது என்றும், அதற்காக தற்போது அவரும் பயிற்சி மேற்கொண்டு வருகிறார் என கூறப்படுகிறது.