அஜித்தின் இந்த இரண்டு படங்களை ஹிந்தியில் ரீமேக் செய்யும் போனி கபூர்?

மறைந்த நடிகை ஸ்ரீதேவியின் கணவர் போனி கபூர். இவர் பாலிவுட்டில் முன்னணி தயாரிப்பாளர்களில் ஒருவர். அஜித்தின் நேர்கொண்ட பார்வை படத்தின் மூலமாக தமிழ் சினிமாவில் அவர் காலடி எடுத்து வைத்தார். அதனைத் தொடர்ந்து தற்போது அஜித்தின் அடுத்த படமான வலிமை படத்தையும் தயாரித்து வருகிறார். நேர்கொண்ட பார்வை படத்தினை இயக்கிய ஹெச் வினோத் தான் வலிமை படத்தினையும் தற்போது இயக்கி வருகிறார்.

அஜித் இதற்கு முன்பு ஸ்ரீதேவி நடித்த இங்கிலீஷ் விங்கிலீஷ் படத்தில் ஒரு கெஸ்ட் ரோலில் நடித்திருப்பார். அந்த படத்தில் பணியாற்றிய போது தான் அஜித் மற்றும் போனி கபூருக்கு அறிமுகம் ஏற்பட்டது. அந்த படத்தில் பணியாற்றியதற்காக அஜித் சம்பளம் வாங்கவே இல்லை எனவும் கூறப்படுவதுண்டு. அந்த சமயத்தில் இணைந்து ஒரு படத்தில் பணியாற்றலாம் என ஸ்ரீதேவியிடம் அஜித் வாக்கு கொடுத்திருக்கிறார். அதற்காகத் தான் தற்போது நேர்கொண்ட பார்வை, வலிமை என தொடர்ந்து இரண்டு படங்களில் போனி கபூர் உடன் அஜித் பணியாற்றி வருகிறார்.

இந்நிலையில் போனி கபூர் அஜித் நடித்த வாலி மற்றும் வரலாறு ஆகிய படங்களை பார்த்து வியந்ததாகவும் அந்த படங்களை இந்தியில் ரீமேக் செய்ய விரும்பி அதன் ரீமேக் உரிமைகளை தற்போது வாங்கி இருப்பதாகவும் தகவல்கள் பரவி வருகிறது. முதலில் வாலி படத்தினை பாலிவுட்டில் அவர் ரீமேக் செய்ய உள்ளார் என்று கூறப்படுகிறது. அந்த படத்தில் அவரது மகன் அர்ஜுன் கபூர் தான் ஹீரோவாக நடிப்பார் என்றும் கூறப்படுகிறது.

வாலி படத்தில் ஹீரோ, வில்லன் என இரண்டு ரோல்களில் அஜித் நடித்திருப்பார். சிம்ரன் ஹீரோயினாக நடித்துள்ள இந்தப் படத்தினை எஸ்.ஜே சூர்யா தான் இயக்கியிருந்தார். அதற்கு முன்பு ஆசை படத்தில் அஜித் நடித்த போது அதில் உதவி இயக்குனராக எஸ். ஜே. சூர்யா பணியாற்றிக் கொண்டிருந்தார். ஷூட்டிங ஸ்பாட்டில் எஸ். ஜே. சூர்யா மிகவும் சிறப்பாக பணியாற்றிக் கொண்டிருந்தார். அதே நேரத்தில் அவரது சட்டையில் பட்டன்கள் கூட இருக்காது, சேஃப்டி பின் போட்டிருப்பார், செருப்பு தேய்ந்து பிய்ந்து போகும் நிலையில் இருக்கும், அதையெல்லாம் பார்த்து அஜித் யார் இவர் என ஆச்சர்யப்பட்டாராம். அதற்கு பின் தான் பின்னாளில் அவருக்கு ஒரு படத்தை இயக்கும் வாய்ப்பு கொடுத்திருக்கிறார் அஜித். அப்படி உருவான அந்த படம் தற்போதும் ரசிகர்களால் பேசப்படும் படங்களில் ஒன்றாக இருக்கிறது.

வாலி படத்தின் பாலிவுட் உரிமை பற்றிய செய்தி வெளியாகி இருப்பது அஜித் ரசிகர்களுக்கு மகிழ்ச்சியை ஏற்படுத்தியுள்ளது. பலரும் அது பற்றி சமூக வலைதளங்களில் பதிவிட்டு வருகின்றனர். இந்தி ரீமேக் படத்தின் நடிகர்கள் மற்றும் டெக்னீஷியன்கள் தேர்ந்தெடுக்கும் பணிகள் தற்போது நடந்து வருவதாகவும் கூறப்படுகிறது.

போனி கபூர் தற்போது தமிழ் மட்டுமின்றி தெலுங்கிலும் கவனம் செலுத்தி வருகிறார். தமிழில் மிகப்பெரிய பட்ஜெட்டில் உருவாகும் வலிமை படம் ஒருபுறமிருக்க, தெலுங்கில் பவர் ஸ்டார் பவன் கல்யாண் நடிப்பில் வக்கீல் சாப் என்ற படத்தினை அவர் தயாரித்து வருகிறார். தமிழில் நேர்கொண்ட பார்வை என்ற பெயரில் உருவான பிங்க் படக் கதையை தான் தெலுங்கில் வக்கீல் சாப் என்ற பெயரில் ரீமேக் செய்து வருகின்றனர்.