விஜய் மகன் பிறந்தநாளில் நடந்த அதிசயம்: அப்படியே 'ஷாக்' ஆன ட்விட்டர்

அஜித்தும், விஜய்யும் நிஜ வாழ்க்கையில் நண்பர்கள் ஆவர். அவர்கள் மட்டும் அல்ல அவர்களின் குடும்பத்தாரும் நட்புடன் பழகி வருகிறார்கள். சங்கீதா விஜய்யும், ஷாலினியும் தோழிகள். இது எல்லாமே விஜய் மற்றும் அஜித் ரசிகர்களுக்கு நல்லாவே தெரியும்.

இருப்பினும் சமூக வலைதளங்களில் அவ்வப்போது மோதிக் கொள்கிறார்கள். சண்டை போடுவதற்காகவே ஹேஷ்டேகுகள் உருவாக்கி அதை ட்விட்டரில் தேசிய அளவில் டிரெண்ட் செய்வார்கள். அந்த ஹேஷ்டேகுகள் ஏன் டிரெண்டாகிறது என்று புரியாத பிற மொழிக்காரர்கள் அதன் அர்த்தம் கேட்ட கதை எல்லாம் நடந்திருக்கிறது.

சில நேரத்தில் தமிழில் ஹேஷ்டேகை டிரெண்ட் செய்யவிடுவார்கள். அதை பார்த்து இதன் அர்த்தம் என்ன என்று வெளிநாட்டுக்காரர்கள் கூட கேட்டிருக்கிறார்கள். இப்படி ட்விட்டரில் எலியும், பூனையுமாக இருக்கும் அஜித், விஜய் ரசிகர்கள் இன்று செய்த காரியத்தை பார்த்தவர்களால் அவர்களின் கண்களையே நம்ப முடியவில்லை.

ஒரு முறைக்கு, இரண்டு முறை கண்ணை கசக்கிவிட்டுப் பார்த்த பிறகே ஆமாம், நெசமாத்தான் நடந்திருக்கு என்று நம்பியுள்ளனர். விஜய், அஜித் ரசிகர்கள் அப்படி என்ன செய்தார்கள் என்று கேட்கிறீர்களா?.
#AjithVijayPRIDEOFINDIA என்கிற ஹேஷ்டேகை உருவாக்கி ட்வீட் செய்து கொண்டிருக்கிறார்கள் அஜித் மற்றும் விஜய் ரசிகர்கள். அந்த ஹேஷ்டேக் ட்விட்டரில் தேசிய அளவில் டிரெண்டாகியுள்ளது.
அஜித்தை விஜய் ரசிகர்கள் திட்டவில்லை, கிண்டல் செய்யவில்லை. விஜய்யை அஜித் ரசிகர்கள் கலாய்க்கவில்லை, விளாசவில்லை. மாறாக ஹார்ட், ஹார்ட் சிம்பளமாக போட்டு பாசத்தை பொழிந்து கொண்டிருக்கிறார்கள். அன்பை பரப்புவோம், அன்பாக இருப்போம், நம் ஒற்றுமையை காட்டி வரலாறு படைப்போம் என்று விஜய், அஜித் ரசிகர்கள் கூறியதை பார்த்த சமூக வலைதளவாசிகளால் சும்மா இருக்க முடியவில்லை.
விஜய் ரசிகர் ஒருவர் மருத்துவமனையில் அனுமதிக்கப்பட்டிருக்கும் தன் உறவினருக்கு நிதியுதவி செய்யுமாறு கேட்டு ட்வீட் செய்தார். அதை பார்த்த அஜித் ரசிகர்கள் சுமார் ரூ. 30 ஆயிரம் வரை பணம் கொடுத்து உதவியுள்ளனர். தல ரசிகர்களின் இந்த பாசத்தை பார்த்த விஜய் ரசிகர்கள் அசந்துவிட்டனர். அதன் பிறகே #AjithVijayPRIDEOFINDIA என்கிற ஹேஷ்டேகை டிரெண்டாக்கவிட்டுள்ளனர்.

அஜித், விஜய் ரசிகர்களின் ட்வீட்டுகளை பார்த்த சமூக வலைதளவாசிகள் கூறியிருப்பதாவது,

இது என்னய்யா புது பெர்ஃபாமன்ஸு. ஏதோ நீங்கள் இரண்டு கோஷ்டிகளும் ஒத்துமையா இருந்தால் சரி. தல, தளபதி ரசிகர்கள் ஒத்துமையா ட்வீட் செய்வதை பார்த்து ஒரு நிமிஷம் தலையே சுத்திருச்சு. ஆத்தி, என்னமா பாசத்தை பொழிகிறார்கள்.

ஒருத்தரையொருத்தர் பாராட்டுவதும், ரத்தத்தின் ரத்தமே என்று சொல்வதும் நம்புற மாதிரி இல்லையே. ஏதோ, ஒத்துமையா இருந்தால் சரி. இனிமேலாவது சண்டை போடாமல் இப்படியே இருங்க ராசாக்களா என்று தெரிவித்துள்ளனர்.

அஜித்தும், விஜய்யும் சேர்ந்து ஒரு படத்தில் நடிக்க வேண்டும் என்று ரசிகர்கள் கோரிக்கை விடுத்துள்ளனர். விஜய்யின் மகன் ஜேசன் சஞ்சய் பிறந்தநாளான இன்று இப்படி ஒரு அதிசயம் நடந்திருக்கிறது என்று விமர்சனம் எழுந்துள்ளது.

கொரோனா அறிகுறியுடன் வீட்டில் தனியாக இருந்த நண்பர்: சிட்டா பறந்து வந்த விஜய்