மீண்டும் ‘தேவி 2’க்காக இணையும் விஜய் - பிரபுதேவா!

விஜய்யும், பிரபுதேவாவும், ‘லட்சுமி’ படத்தைத் தொடர்ந்து அடுத்ததாக ‘தேவி 2’ படத்துக்காக இணையவுள்ளனர்.

பிரபுதேவா & தமன்னா நடிப்பில் 2016ல் வெளியான ஹாரர் படம் ‘தேவி’. இந்தப் படத்தை ஏ.எல். விஜய் இயக்கியிருந்தார். மேலும் இந்தப் படத்தில் நடிகர்கள் சோனு சூட், ஆர்.ஜே. பாலாஜி, ஆர்.வி.உதயகுமார், சதீஷ், நாசர், சஞ்சய் பாரதி ஆகியோர் முக்கிய வேடங்களில் நடித்தனர். இந்தப் படம் தமிழ், தெலுங்கு மற்றும் இந்தி என மூன்று மொழிகளிலும் வெளியானது.

‘தேவி’யைத் தொடர்ந்து இயக்குனர் ஏ.எல்.விஜய் ‘லட்சுமி’ படத்தை இயக்கி வந்தார். இந்தப் படத்தில் பிரபுதேவா ஹீரோவாக நடித்துள்ளார். நடனத்தை மையமாக வைத்து எடுக்கப்பட்டுள்ள இந்தப் படத்தில், மொத்தம் 12 பாடல்கள் இடம்பெற்றுள்ளன. இந்தப் படத்தில் ஐஸ்வர்யா ராஜேஷ், கருணாகரன், கோவை சரளா, சாம்ஸ் உட்பட பலர் நடித்துள்ளனர்.

இந்தப் படத்திற்க சாம் சி.எஸ். இசையமைத்துள்ளார். இந்தப் படத்தை ப்ரமோத் பிலிம்ஸ் மற்றும் ட்ரைடெண்ட் ஆர்ட்ஸ் இணைந்து தயாரித்து வருகிறது. ‘லட்சுமி’ வருகிற நவம்பர் மாதம் வெளியிடத் திட்டமிட்டுள்ளனர்.

இதைத் தொடர்ந்து பிரபுதேவா - விஜய் கூட்டணி ‘தேவி 2’ படத்துக்காக மீண்டும் இணைகிறது. தற்போது ‘யங் மங் சங்’, ‘சார்லி சாப்ளின் 2’, ‘காமோஷி’ ஆகிய படங்களில் நடித்துவரும் பிரபுதேவா, ‘தபாங் 3’ இந்திப் படத்தை இயக்குவதற்கான பணிகளிலும் ஈடுபட்டுள்ளார்.