அழகிய சிறுக்கி.. விஜய் சேதுபதியின் க/பெ ரணசிங்கம் பட பாடல் இதோ

விஜய் சேதுபதி மற்றும் ஐஸ்வர்யா ராஜேஷ் இருவரும் மீண்டும் ஜோடி சேர்ந்து நடித்துள்ள படம் க/பெ ரணசிங்கம். இந்த படத்தின் டிரைலர் சில மாதங்களுக்கு முன்பு வெளிவந்து நல்ல வரவேற்பை பெற்றது. இந்த படத்தில் விஜய் சேதுபதி சமுதாயத்தில் இருக்கும் பல்வேறு பிரச்சனைகளுக்கு எதிராக குரல் கொடுக்கும் நபராக நடித்திருக்கிறார். குறிப்பாக தண்ணீரை வியாபாரம் ஆக்கிய சிலருக்கு எதிராக அவர் போராட்டம் நடத்துவது போல படத்தின் டிரைலரில் காட்டப்பட்டிருந்தது.

பெரிய எதிர்பார்ப்பில் இருக்கும் இந்த படத்திற்கு ஜிப்ரான் இசையமைத்து வருகிறார். தற்போது இந்த படத்தில் இருந்து முதல் பாடல் 'அழகிய சிறுக்கி' பாடலை படக்குழு அதிகாரப்பூர்வமாக வெளியிட்டு இருக்கிறது.

டி சீரிஸ் நிறுவனத்தின் யூடியூப் பக்கத்தில் வெளியிடப்பட்டுள்ள இந்த லிரிக்கல் வீடியோவுக்கு தற்போது ரசிகர்கள் மத்தியில் நல்ல வரவேற்பு கிடைத்து வருகிறது. அழகிய சிறுக்கி பாடலுக்கு வைரமுத்து வரிகள் எழுத கோல்ட் தேவராஜ் என்பவர் பாடி இருக்கிறார்.


க/பெ ரணசிங்கம் படம் ரிலீஸுக்கு தயாராக இருக்கும் சூழ்நிலையில் தியேட்டர்கள் தற்போது மூடப்பட்டு இருப்பதால், இதனை நேரடியாக ஓடிடி தளத்தில் வெளியிட பேச்சுவார்த்தை நடந்து வருவதாக செய்தி வெளியானது. ஆனால் அது உண்மை இல்லை, நாங்கள் தியேட்டரில் தான் படத்தை வெளியிடுவோம் என தயாரிப்பாளர்கள் அதிகாரபூர்வமாக விளக்கம் அளித்து இருந்தார்கள். இதன் மூலமாக அந்த வதந்திக்கு முற்றுப்புள்ளி வைத்திருந்தார்கள்.

க/பெ ரணசிங்கம் படத்தின் விஜய் சேதுபதியின் கதாபாத்திரம் முக்கியமானதாக இருந்தாலும் அதில் அவர் குறைந்த அளவு நேரம் மட்டுமே வருவார் என்றும், மீதி படம் முழுவதும் அவரது மனைவியாக நடித்திருக்கும் ஐஸ்வர்யா ராஜேஷ் கதாபாத்திரத்தினை சுற்றி தான் இருக்கும் என கூறப்படுகிறது.

கேஜேஆர் நிறுவனம் தயாரிக்கும் க/பெ ரணசிங்கம் படத்தினை விருமாண்டி இயக்கி இருக்கிறார். கொரோனா பிரச்சனை எழாமல் இருந்திருந்தால் கடந்த சில மாதங்களுக்கு முன்பே இந்த படம் தியேட்டர்களில் வெளியாகி இருக்கும்.

க/பெ ரணசிங்கம் டீசரில் விஜய் சேதுபதியின் காட்சிகள் தான் அதிக அளவில் காட்டப்பட்டு இருந்தது. இசையமைப்பாளர் ஜிப்ரான் இந்த படம் பற்றி பேசும்போது இது இன்னொரு அறம் படமாக இருக்கும் என வியந்து பாராட்டி இருந்தார். "அறம் படத்திற்கு பிறகு தமிழ் சினிமாவிற்கு மிக முக்கிய படமாக இது இருக்கும்" என ஜிப்ரான் கூறியுள்ளார்.

இந்த படத்தில் இசையமைப்பாளர் ஜி.வி.பிரகாஷின் தங்கை முக்கிய ரோலில் நடித்து இருக்கிறார். மேலும் முக்கிய ரோல்களில் ரங்கராஜ் பாண்டே, யோகி பாபு, சமுத்திரக்கனி, வேலா ராமமூர்த்தி, பூ ராம் உள்ளிட்ட பலர் நடிக்கிறார்கள்.

க/பெ ரணசிங்கம் டீஸர் ஏற்கனவே பெரிய எதிர்பார்ப்பை ஏற்படுத்தி இருக்கும் சூழலில் தற்போது வந்திருக்கும் முதல் பாடலும் அதை அதிகரித்து இருக்கிறது.

விஜய் சேதுபதியின் மற்றொரு படமான மாஸ்டர் படத்திற்கும் மிகப்பெரிய எதிர்பார்ப்பு எழுந்திருக்கிறது. அந்த படத்தில் அவர் விஜய்க்கு வில்லனாக நடித்திருகிறார். அவருடன் முதல் முறையாக விஜய் சேதுபதி இணைந்து நடித்திருப்பது குறிப்பிடத்தக்கது. அந்த படமும் கொரோனா காரணமாக இன்னும் ரிலீஸ் ஆகாமல் இருக்கிறது.