தெலுங்கில் காலா தோல்வியால் 2.0க்கு பாதிப்பா?

நடிகர் ரஜினிகாந்தின் காலா திரைப்படம் உள்நாட்டில் தமிழில் மட்டும் நன்றாக ஓடிக் கொண்டு இருக்க, தெலுங்கு மொழியில் எதிர்பார்த்த வசூல் இல்லாத நிலையில், 2.0 படத்திற்கு உரிமம் வாங்கிய விநியோகஸ்தர்கள் பணத்தை திருப்பிக் கேட்பதாக செய்தி வெளியாகியுள்ளது.

நடிகர் ரஜினிகாந்தின் காலா திரைப்படம் தமிழில் வெற்றி பெற்ற நிலையில், இந்தி மற்றும் தெலுங்கில் வெற்றி பெறவில்லை. அந்த இரண்டு மொழி மக்களுக்கும் ஏற்ற கதையம்சம் இந்த திரைப்படத்தில் இல்லை என்பதுதான் அடிப்படைக் காரணம். அதுவும், இந்தப் படத்தில் தமிழ்நாட்டில் இருந்து மும்பை தாராவி சென்ற தமிழர் ஒருவர் அவர்களுடைய நிலத்தை ஆளுவதை கதையளவில் கூட அவர்களால் ஏற்றுக் கொள்ளவில்லை. தெலுங்கு மொழிக்கு ஏற்ற கதையம்சம் சுத்தமாக காலா படத்தில் இல்லை என்பது அவர்களது வாதமாக இருக்கிறது. தமிழராக மும்பை சென்று ஆளுமை செலுத்துவதை காலா படத்தில் தமிழ் ரசிகர்கள் ரசித்துள்ளனர். இந்த முரண்பாடுகளால் காலா தேசிய அளவில் பெரிய வெற்றியைப் பெறவில்லை என்றுதான் கூற வேண்டும்.

ரஜினிகாந்த் நடிப்பில் சுமார் ரூ. 400 கோடி பட்ஜெட்டில் உருவானதாக கூறப்படும் 2.0 திரைப்படம் திரைக்கு வருவதற்காக காத்திருக்கிறது. இந்தப் படத்தின் வெளியீடும் அடுத்த ஆண்டுக்கு ஒத்தி வைக்கப்பட்டுள்ளது. இதற்கு தற்போது பாதிப்பு ஏற்பட்டுள்ளது. தெலுங்கில் இந்தப் படத்தை அதிக விலை கொடுத்து விநியோகஸ்தர்கள் வாங்கியுள்ளனர். தற்போது காலா தெலுங்கில் வெற்றி பெறாததால், கொடுத்த முன்பணத்தை விநியோகஸ்தர்கள் திரும்பக் கேட்டு வருவதாக செய்தி வெளியாகியுள்ளது. இதனால், 2.0 தயாரிப்பாளர்களுக்கு சிக்கல் ஏற்பட்டுள்ளது.

இவர்கள் கடன் வாங்கி முன் பணம் கொடுத்து இருப்பதாகவும். அடுத்த ஆண்டே 2.0 திரைக்கு வர இருப்பதாலும், இந்த சிக்கலில் இருந்து தப்பிக்க முன் பணத்தை திரும்பக் கேட்டு வருவதாக செய்தி வெளியாகியுள்ளது. முன் பணத்தை திரும்ப அளிப்பதில் தாமதம் ஏற்பட்டு இருப்பதாக ஒரு தகவலும், முன் பணத்தை கொடுக்க முன் வந்துள்ளனர் என்று மற்றொரு தகவலும் வெளியாகியுள்ளது.