அறிமுக இயக்குனர் படத்தில் இணையும் அனிருத் மற்றும் விவேக் மெர்வின்!

அறிமுக இயக்குனர் ஹரீஷ் ராம் இயக்கவுள்ள படத்திற்கு அனிருத்தும், விவேக் மெர்வினும் இணைந்து இசையமைக்கவுள்ளனர்.

இயக்குனர் துரை.செந்தில்குமாரின் உதவியாளர் ஹரீஷ் ராம் தற்போது புதிய படத்தில் இயக்குனராக அறிமுகமாகிறார். இந்தப் படத்தில் பிரதான பாத்திரங்களில் புதுமுகங்கள் நடிக்க இருக்கின்றனர். ஒளிப்பதிவாளர் ரவிவர்மனிடம் உதவியாளராகப் பணியாற்றிய நரேன் இளன், இந்தப் படத்துக்கு ஒளிப்பதிவு செய்கிறார்.

ராம் ராகவ் மற்றும் ஏ.ஆர்.பிரபாகரன் இருவரும் வசனம் எழுதியுள்ளனர். இந்தப் படத்தை ரீகல் ரீல்ஸ் பிரைவேட் லிமிடெட் மற்றும் ரோல் டைம் ஸ்டுடியோஸ் இணைந்து தயாரிக்கின்றனர். இந்தப் படத்தின் படப்பிடிப்பு வருகிற அக்டோபர் மாதம் தொடங்க இருக்கிறது.

இந்தப் படத்துக்கு அனிருத் மற்றும் விவேக் மெர்வின் ஆகியோர் இணைந்து இசையமைக்கின்றனர். முன்னணி இசையமைப்பாளர்களில் ஒருவரான அனிருத், பிற இசையமைப்பாளர்களுடன் இணைந்து இசையமைப்பது ஆச்சரியத்தை ஏற்படுத்தியுள்ளது.