விஷாலுக்கு பாடிய அனிருத்!

நடிகர் விஷாலுக்காக அவர் நடிக்கும் படத்தில் முதன்முறையாக ஒரு பாடலை பாடியிருக்கிறார் அனிருத்.
பல முன்னணி நடிகர்களுக்கு பின்னணி பாடல்களை பாடிய இசையமைப்பாளர் அனிருத், தற்போது முதல் முறையாக விஷாலுக்கும் தன் குரலில் ஒரு பாடலை பாடியுள்ளார். விஷால் நடிப்பில் தற்போது உருவாகியுள்ள படம் ‘மருது’. இதில் விஷாலுக்கு ஜோடியாக ஸ்ரீதிவ்யா நடித்துள்ளார். மேலும் காமெடி வேடத்தில் சூரியும், வில்லன் கதாபாத்திரத்தில் ஆர்.கே.சுரேஷும் நடித்துள்ளனர். இப்படத்தை ‘கொம்பன்’ பட முத்தையா இயக்கியுள்ளார். விறுவிறுப்பாக நடந்து வந்த இப்படத்தின் படப்பிடிப்பு சமீபத்தில் முடிந்தது.
தற்போது படத்தின் பின்னணி வேலைகள் விறுவிறுப்பாக நடந்து வருகிறது. இமான் இப்படத்திற்கு இசையமைத்து வருகிறார். இவருடைய இசையில் தற்போது பாடல்கள் பதிவு செய்யப்பட்டு வருகின்றன. இப்படத்தில் அனிருத் ஒரு பாடலை பாடியிருக்கிறார். இந்த பாடல் ரசிகர்களிடையே பெரிய வரவேற்பு பெறும் என்று படக்குழு நம்பிக்கை தெரிவித்துள்ளனர். இந்த பாடல் மூலம் விஷால் படத்திற்கு அனிருத் முதல் முறையாக பாடியிருக்கிறார்.
ஏற்கனவே இமான் இசையில் ஜெயம் ரவி நடிப்பில் வெளியான ‘ரோமியோ ஜூலியட்’ படத்தில் அனிருத் ‘டண்டனக்கா...’ என்ற பாடலை பாடியிருந்தார். இந்த பாடல் ரசிகர்கள் மத்தியில் பலத்த வரவேற்பு பெற்றது. அதுபோல் புதிய படத்தின் பாடலும் சிறப்பான வரவேற்பினை பெறும் என்று எதிர்பார்க்கப்படுகிறது.