எளிமையின் அடையாளமாக விளங்கும் அஜித்; வியந்து போன ’விஸ்வாசம்’ படக்குழு!

ஐதராபாத்: அஜித்தின் எளிமையைக் கண்டு, விஸ்வாசம் படக்குழுவினர் ஆச்சரியத்தில் மூழ்கினர்.

சிவா இயக்கத்தில் விஸ்வாசம் படத்தில் நடிகர் அஜித் நடித்து வருகிறார். இதில் நயன்தாரா நாயகியாக நடித்துக் கொண்டிருக்கிறார். இதன் முதல் கட்ட படப்பிடிப்பு ஐதராபாத் ராமோஜிராவ் பிலிம்சிட்டியில் நடைபெற்றது. அப்போது நட்சத்திர ஹோட்டல் ஒன்றில், நடிகர் அஜித்திற்கு அறை ஒதுக்கப்பட்டிருந்தது.

கடந்த 10ஆம் தேதி படப்பிடிப்பு முடிந்த நிலையில், சில காட்சிகள் படமாக்க மேலும் 2 நாட்கள் தேவைப்பட்டது. ஆனால் அறைக்கான முன்பதிவு முடிந்தது. இந்நிலையில், மேலும் 2 நாட்கள் தங்க ஹோட்டல் நிர்வாகத்திடம் தயாரிப்பு நிர்வாகி கேட்டார்.

ஆனால் அந்த அறை 11ஆம் தேதியில் இருந்து, இந்தி நடிகர் ரன்வீர் கபூருக்கு ஒதுக்கப்பட்டிருந்தது. இந்த சூழலில் மற்றொரு படத்திற்கு இடையூறு ஏற்படாத வண்ணம் அஜித் செயல்பட்டுள்ளார். அதாவது தனது அறையை காலி செய்துவிட்டு, அந்த ஹோட்டலின் சிறிய அறையில் தங்கினார்.

அப்போது, ’தனக்கு ஒரு சின்ன கட்டிலும், மின் விசிறியும் இருந்தால் போதும்’ என்று கூறியுள்ளார். இதையறிந்த படக்குழுவினர் ஆச்சரியத்தில் மூழ்கினர். விஸ்வாசம் படத்தின் இரண்டாம் கட்ட படப்பிடிப்பு வரும் 27ஆம் தேதி சென்னையில் நடைபெறுகிறது.

Another example of Thala Ajith 's simplicity.