சிரஞ்சீவியின் 151வது படத்தில் அனுஷ்கா?

சிரஞ்சீவியின் 151வது படத்தில் நடிகை அனுஷ்காவை நடிக்க வைக்க பேச்சு வார்த்தை நடைபெற்று வருகிறது.

இந்த ஆண்டு அனுஷ்கா நடிப்பில் தமிழில் ‘சிங்கம் 3’, தெலுங்கில் ‘ஓம் நமோ வெங்கடேஷாய’, தமிழ், தெலுங்கு, இந்தி, மலையாளம் என நான்கு மொழிகளில் உருவாகிய ‘பாகுபலி2’ ஆகிய மூன்று படங்கள் வெளியாகவுள்ளன. இத்துடன் அனுஷ்கா ‘பாஹ்மதி’ எனும் சரித்திர படத்திலும் நடித்து வருகிறார்.

சிரஞ்சீவியின் 150வது படமான ‘கைதி நம்பர் 150’ படத்தில் அவருக்கு ஜோடியாக நடிக்க அனுஷ்காவிடம் முதலில் பேச்சு வார்த்தை நடைபெற்றது. ‘பாகுபலி-2’ படத்தில் அனுஷ்கா பிசியாக இருந்ததால் அந்தப் படத்தில் நடிக்க முடியாமல் போனது. அதனால் காஜல் அகர்வால் கைதி நம்பர் 150 படத்தில் நடித்தார். தற்போது மீண்டும் சிரஞ்சீவியின் 151வது படத்தில் நடிக்க அவருக்கு அழைப்பு விடுக்கப்பட்டுள்ளது. படத்தை சுரேந்தர் ரெட்டி இயக்குகிறார். 151வது படத்தை அவரது மகன் ராம் சரண் தயாரிக்கவுள்ளார். அப்படத்தில் சிரஞ்சீவிக்கு ஜோடியாக நடிக்க அனுஷ்காவிடம் பேச்சு வார்த்தை நடைபெற்று வருவதாக தகவல்கள் வெளிவந்துள்ளன.