ஓரம் கட்டும் தமிழ் சினிமா: தெலுங்கு திரையுலகிற்கு செல்லும் முன்னணி இயக்குனர்கள்!

கடந்த சில வருடங்களாகவே தமிழ் சினிமாவில் முன்னணி இயக்குனர்களாக திகழும் பலருக்கு சொல்லிக்கொள்ளும்படியான பெரிய வெற்றிகள் அமையவில்லை. முன்னணி நடிகர்கள் பலரும் கூட வளரும் இளம் இயக்குனர்கள் இயக்கத்தில் நடிக்க ஆர்வம் காட்டி வருகின்றனர். இதனால் தமிழ் சினிமாவின் முன்னணி இயக்குனர்கள் சிலர், வேறு மொழி படங்கள் இயக்க தயாராகி வருகின்றனர். அந்த வரிசையில் ஷங்கர், முருகதாஸ், லிங்குசாமி ஆகியோர் அடுத்தடுத்து தொடர்ந்து தெலுங்கு படங்களை இயக்க உள்ளனர்.

தமிழ் படங்களுக்கு தெலுங்கு திரையுலகிலும் நல்ல மார்க்கெட் உள்ளது. இதனால் பெரிய ஹீரோக்களின் படங்கள் வெளியாகும் போது தெலுங்கிலும் டப் செய்து வெளியிடப்படும். அதே போல் தெலுங்கு திரையுலகிலும் நடிகர், நடிகைகள், இயக்குனர்களுக்கு அதிக சம்பளம் கொடுக்க தயாராக இருக்கின்றனர் தயாரிப்பாளர்கள். இதனால் ஒருசில தமிழ் இயக்குனர்களின் பார்வை தெலுங்கு திரையுலகம் பக்கம் சாய ஆரம்பித்துள்ளது.

ஏற்கனவே இயக்குனர் ஷங்கர் தெலுங்கு சினிமாவின் முன்னணி இயக்குனர் ராம்சரண் நடிக்கும் புதிய படம் ஒன்றை இயக்க ஒப்பந்தமாகியுள்ளார். தமிழில் அவர் இயக்கிய இந்தியன் 2 திரைப்படத்தின் இறுதிக்கட்ட பணிகள் முடிவடையாமல் இருப்பதால், அவர் வேறு எந்த திரைப்படத்தையும் இயக்க கமிட் ஆகக்கூடாது என்று லைகா நிறுவனம் வழக்கு தொடுத்துள்ளது. இந்த பிரச்சனைகள் எல்லாம் ஓய்ந்த பின் ஷங்கர், ராம்சரணை வைத்து தெலுங்கில் படம் இயக்க ஆரம்பிப்பார் என எதிர்பார்க்கப்படுகிறது.

சலாம் ராக்கி பாய்: திரைத்துறையை சேர்ந்த தொழிலாளர்களுக்கு நேரடியாக உதவும் நடிகர் யாஷ்!
லிங்குசாமியும் தெலுங்கு திரைப்படம் ஒன்றை இயக்கி வருகிறார். இதில் ராம் போதினேனி கதாநாயகனாக நடிக்கிறார். இவர்களை தொடர்ந்து இயக்குனர் ஏ.ஆர்.முருகதாசும் தெலுங்கு படம் ஒன்றை இயக்க உள்ளார். இவர் கடைசியாக தமிழில் ரஜினிகாந்தை வைத்து இயக்கிய தர்பார் திரைப்படம் எதிர்பார்த்த வெற்றியை பெறவில்லை. இதனையடுத்து விஜய்யின் 65 வது படத்தை முருகதாஸ் இயக்குவார் என எதிர்பார்க்கப்பட்ட நிலையில், அந்த வாய்ப்பும் இளம் இயக்குனர் நெல்சனுக்கு சென்றது.

இதனையடுத்து தற்போது ஏ.ஆர்.முருகதாஸ் தெலுங்கு படம் ஒன்றை இயக்க உள்ளதாக தகவல்கள் வெளியாகியுள்ளன. இந்த படத்திலும் ராம் போதினேனி ஹீரோவாக நடிக்க உள்ளாராம். முருகதாஸ் ஏற்கனவே மகேஷ் பாபுவை வைத்து தெலுங்கு படம் ஒன்றை இயக்கியுள்ளது குறிப்பிடத்தக்கது. தமிழ் சினிமாவின் முன்னணி இயக்குனர்கள் தெலுங்கு திரையுலகம் எந்தளவிற்கு கை கொடுக்கிறது என்பதை பொறுத்திருந்து பார்ப்போம்.