ரங்கூன் ஹீரோயின் சிம்ரன் இடத்தைப் பிடிப்பார்: ஏ.ஆர்.முருகதாஸ்

ரங்கூன் படத்தின் ஹீரோயின் நடிகை சிம்ரன் இடத்தைப் பிடிப்பார் என்று ஏ.ஆர்.முருகதாஸ் நம்பிக்கை தெரிவித்துள்ளார்.

ஏ.ஆர்.முருகதாஸின் உதவியாளராக இருந்த ராஜ்குமார் பெரியசாமி இயக்கத்தில் உருவாகியுள்ள படம் ரங்கூன். ஃபாக்ஸ் ஸ்டார் ஸ்டுடியோஸ் மற்றும் ஏ.ஆர்.முருகதாஸ் புரோடக்ஷன்ஸ் இணைந்து தயாரித்துள்ள இப்படத்தில் கௌதம் கார்த்திக், சனா மக்புல் ஆகியோர் பலர் நடித்துள்ளனர். அறிமுக இசையமைப்பாளர் விக்ரம் மற்றும் விஷால் சந்திரசேகர் இசையமைத்துள்ள இப்படத்தின் இசை வெளியீடு சென்னையில் நடந்தது.

இதில், விழாவில் இயக்குனர் ஏ.ஆர்.முருகதாஸ் கலந்து கொண்டு இசைத்தட்டினை வெளியிட்டார். அப்போது பேசிய ஏ.ஆர்.முருகதாஸ் கூறுகையில், இயக்குனர் ராஜ்குமார் என்னிடம் பணியாற்றினாலும், இல்லாவிட்டாலும் எனக்காக வந்து என் படங்களுக்கு உதவி செய்பவர்.

சிலர் உதவி இயக்குனர் ஆவதற்கும், ஒரு சிலர் இயக்குனர் ஆவதற்கும் ரொம்ப கஷ்டப்படுவார்கள். ராஜ்குமார் இரண்டுக்குமே ரொம்ப கஷ்டப்பட்டார். புதுப்புது இடங்களாக தேடித் தேடி திரையில் தான் நினைத்ததை கொண்டு வர ரொம்பவே கஷ்டப்பட்டிருக்கிறார்.

சின்னத்திரையில் இருந்து வந்து இயக்குனராகி இருக்கும் ராஜ்குமார் வெற்றி பெற்றால் தான் அவரைப் போல முயற்சி செய்து வரும் இயக்குனர்கள அனைவருக்கும் நம்பிக்கை வரும். படத்தின் ஹீரோ கௌதம் கார்த்திக் இப்படத்திற்காக தன் நிறத்தை மாற்றி ரொம்பவும் கஷ்டப்பட்டுள்ளார்.

சிம்ரன் முதல் படத்தில் நான் உதவி இயக்குனராக வேலை செய்திருக்கிறேன். அதை வைத்து பார்க்கும் போது சிம்ரனின் இடத்தை ரங்கூன் படத்தின் ஹீரோயின் சனா பிடிப்பார் என்று நம்புகிறேன். தொடர்ந்து நல்ல படங்களை கொடுக்கும் நோக்கத்தில் செயல்பட்டு வரும் ஃபாக்ஸ் ஸ்டார் நிறுனத்திற்கு நன்றி தெரிவித்துக் கொள்கிறேன் என்றார். இந்த விழாவில் ஃபாக்ஸ் ஸ்டார் சிஇஓ விஜய் சிங், ஹீரோயின் சனா, இசையமைப்பாளர் விக்ரம் உள்பட படக்குழுவினரும் கலந்து கொண்டு பேசினர்.