Sarkar Controversy: சர்கார் படக் காட்சிகள் ரத்து; சர்ச்சை காட்சிகளை நீக்க தொடங்கியது எடிட்டிங் பணி!

ஏ.ஆர்.முருகதாஸ் இயக்கத்தில் விஜய் நடிப்பில் வெளியான திரைப்படம் ‘சர்கார்’. தீபாவளிக்கு திரைக்கு வருவதற்கு முன்பாகவே, கதை திருட்டு விவகாரத்தில் சிக்கிக் கொண்டது. பின்னர் நீதிமன்றம் வரை சென்று சமரசம் செய்யப்பட்டது.

இதையடுத்து திரைக்கு வந்த ’சர்கார்’ படம், மீண்டும் சர்ச்சையில் சிக்கிக் கொண்டது. படத்தின் கதையில் மறைந்த முன்னாள் முதலமைச்சர் ஜெயலலிதாவை அவமானப்படுத்தும் வகையில் காட்சிகள் இடம்பெற்றிருப்பதாக குற்றச்சாட்டு எழுந்தது.

மேலும் தமிழக அரசின் இலவச திட்டங்களை விமர்சிக்கும் வகையிலும், பொதுமக்களை வன்முறைக்கு தூண்டும் வகையிலும் காட்சிகள் இடம்பெற்றிருப்பதாக புகார் வந்தன. இதனால் ஆளும் அதிமுகவினர் ’சர்கார்’ திரையிட்ட திரையரங்குகள் முன்பு ஆர்ப்பாட்டத்தில் ஈடுபட்டனர்.

நடிகர் விஜய் பேனர்களை கிழித்தும், போஸ்டர்களை எரித்தும் கண்டனம் தெரிவித்தனர். இயக்குநர் ஏ.ஆர்.முருகதாஸ் மீது தேசத்துரோக வழக்கின் கீழ் நடவடிக்கை எடுக்க, சென்னை போலீஸ் கமிஷனர் அலுவலகத்தில் புகார் அளிக்கப்பட்டது.

சர்ச்சைக்குரிய காட்சிகளை நீக்கும் வரை படத்தை திரையிட அனுமதிக்க மாட்டோம் என்று கூறி, மதுரை, கோவையில் நேற்று மதியம் மற்றும் மாலைக் காட்சிகளை அதிமுகவினர் தடுத்து நிறுத்தினர்.

அதிமுகவினர் போராட்டத்தால் தஞ்சை ஜூபிடர், சாந்தி, கமலா ஆகிய தியேட்டர்களில் சர்கார் படத்தின் காலை மற்றும் பகல் காட்சிகள் ரத்து செய்யப்படுவதாக அறிவிக்கப்பட்டுள்ளது. இந்நிலையில் குறிப்பிட்ட காட்சிகளை நீக்க தியேட்டர் உரிமையாளர் சங்கம் ஒப்புக் கொண்டது.

இந்த சீனெல்லாம் இன்னைக்கு தியேட்டர்ல வராது: சர்காரின் நீக்கப்பட்ட காட்சிகள் இதுதான்?

அதன்படி இன்று காலை 10.30 மணிக்கு ‘சர்கார்’ படத்தில் சர்ச்சை காட்சிகளை நீக்க எடிட்டிங் பணிகள் தொடங்கி நடைபெற்று வருகிறது.

இதுகுறித்து பேசிய தமிழ்நாடு தியேட்டர் உரிமையாளர் சங்க இணைச்செயலாளர் ஸ்ரீதர், இன்று மதியம் அல்லது மாலையில் திரையிடப்படும் காட்சிகளில் சர்ச்சைக்குரிய காட்சிகள் இடம்பெறாது என்று கூறினார்.

அதன்படி, மிக்ஸி, கிரைண்டர், ஃபேன் ஆகியவற்றை தூக்கி நெருப்பில் எரியும் காட்சி மற்றும் வரலட்சுமி கதாபாத்திரத்தின் பெயர் கோமளவல்லி என்பதை ஆடியோ கட் செய்யப்படுகிறது. இனிமேல் இந்த காட்சிகள் இடம்பெறாது.