'சதுரங்க வேட்டை 2' படத்திற்கு விடிவுகாலம்: எதிர்பார்ப்பில் ரசிகர்கள்!

கடந்த 2014 ஆம் ஆண்டு எச்.வினோத்தின் இயக்கத்தில் சதுரங்க வேட்டை வெளியாகி வெற்றி பெற்ற போதே அதன் இரண்டாம் பாகத்துக்கான வேலைகள் துவங்கியது. சதுரங்க வேட்டையை விநியோகித்த திருப்பதி பிரதர்ஸ் அதன் இரண்டாம் பாகத்தையும் தயாரிப்பதாக முடிவானது. ஆனால் பைனான்ஸ் பிரச்சனையால் அவர்களால் திட்டமிட்டபடி 'சதுரங்க வேட்டை 2' படத்தை தயாரிக்க இயலவில்லை.

சதுரங்க வேட்டை 2 படத்தை பலரும் கைவிட்ட நிலையில் சதுரங்க வேட்டையை தயாரித்த மனோபாலா 2016 இல் இரண்டாம் பாகத்தையும் தயாரிக்க முன்வந்தார். அரவிந்த்சாமி, த்ரிஷா நடிப்பில் எச் வினோத்தின் கதைக்கு சலீம் பட இயக்குனர் நிர்மல் குமார் திரைக்கதை அமைத்து படத்தை இயக்கினார். 2017 ஆம் ஆண்டு முழு படப்பிடிப்பும் முடிந்து படம் தயாரானது. அதற்குப் பிறகு நான்கு வருடங்களாக பல்வேறு காரணங்களால் படம் வெளியாகாமல் இருந்தது.

இந்நிலையில் தற்போது இந்தப்படத்தின் அனைத்துப் பிரச்சனைகளும் முடிந்து ரிலீசுக்கு தயாராகி உள்ளது என்றும், வரும் ஜனவரி மாதம் இந்தப்படம் ரிலீஸ் ஆக உள்ளதாகவும் அறிவிக்கப்பட்டுள்ளது. ஆன்ஸ்கை டெக்னாலஜி முத்து சம்பந்தம் படத்தை வாங்கியுள்ளார்.

பாகுபலியை மிஞ்சும் பிரம்மாண்டம்: வெளியானது ராஜமெளலியின் 'ஆர் ஆர் ஆர்' டிரெய்லர்!
இந்தப்படத்தை ரிலீஸ் செய்வது குறித்து முத்து சம்பந்தம் கூறும் போது, ஒரு பிரபலமான பழமொழி உள்ளது. சரியான நேரத்தில் மற்றும் சரியான இடத்தில், சரியான விஷயம் நிகழும். சதுரங்க வேட்டை 2 படத்தில் அது நடப்பதைக் கண்டு, நான் மனமார மகிழ்ச்சியடைகிறேன். இப்படத்தின் சில காட்சிகளைப் பார்த்தபோது, பார்வையாளர்களை மகிழ்விக்கும் மற்றும் விமர்சனப் பாராட்டுகளையும் வெல்லும் அனைத்து கூறுகளும் இப்படத்தில் இருப்பதை, என்னால் எளிதாக உணர முடிந்தது. இப்போது, படத்தை வெளியிடும் முயற்சியில் இறுதி பணிகள் மீண்டும் தொடங்கப்பட்டுள்ளன.

அரவிந்த்சாமி நடிப்பில் நரகாசூரன், வணங்காமுடி போன்ற படங்களும் தயாராகி நீண்ட காலமாக வெளியீட்டுக்கு காத்திருக்கின்றன. த்ரிஷாவின் கர்ஜனை, ராங்கி படங்களும் இதேபோல் பல வருடங்களாக வெளியீட்டிற்கு காத்திருக்கின்றன. இந்நிலையில் இவர்களின் 'சதுரங்க வேட்டை 2' படம் நான்கு ஆண்டுகளுக்கு பிறகு ரிலீசாவது ரசிகர்களுக்கு எதிர்பார்ப்பை கிளப்பியுள்ளது.