நான்காவது முறையாக விஜய் - அட்லீ கூட்டணி? ரசிகர்களை கொண்டாட வைத்த தகவல்

இயக்குநர் அட்லி கடைசியாக சென்ற வருடம் வெளிவந்த பிகில் படத்தை தான் இயக்கியிருந்தார். அதற்குப் பிறகு அந்த புதிய படத்தையும் அறிவிக்காமல் இருக்கிறார். அதனால் அவர் அடுத்த படம் யாருடன் என்ற கேள்வி ரசிகர்கள் மனதில் தற்போதும் இருந்து கொண்டு தான் இருக்கிறது. அட்லி இயக்குநர் ஷங்கரிடம் உதவி இயக்குனராக பணியாற்றியதற்கு பிறகு, ராஜா ராணி என்ற படத்தின் மூலம் இயக்குனராக அறிமுகமானார். இந்த படம் மிக பிரம்மாண்டமாக வரவேற்பை பெற்ற நிலையில், அதனைத் தொடர்ந்து விஜய்யுடன் கூட்டணி சேர்ந்தார். அவர் இயக்கிய தெறி படம் நல்ல வசூல் ஈட்டியது. அதனால் அதற்குப் பிறகு விஜய்யுடன் மேலும் இரண்டு முறை இணையும் வாய்ப்பு அவருக்கு கிடைத்தது. மெர்சல் மற்றும் பிகில் ஆகிய படங்கள் வசூலில் சக்கை போடு போட்டன என்பதில் எந்த சந்தேகமும் இல்லை. இந்நிலையில் தற்போது அட்லி மீண்டும் விஜய்யுடன் கூட்டணி சேர உள்ளார் என்ற தகவல் பரவி வருகிறது.

அட்லி தனது ஐந்தாவது படத்திற்காக ஷாருக் கானுடன் தான் கூட்டணி சேர்கிறார் என சென்ற வருடம் இருந்தே செய்திகள் வந்து கொண்டிருக்கிறது. ஆனால் அந்த படம் அதிகாரப்பூர்வமாக இது வரை அறிவிக்கப்படாமல் இருக்கிறது. அந்த படத்தின் கதையில் மாற்றங்கள் செய்யும் படி ஷாருக் கான் கூறினார் என்று கூட செய்திகள் வந்தது குறிப்பிடத்தக்கது. இந்நிலையில் ஷாருக் கான் அடுத்து ராஜ்குமார் ஹிரானி மற்றும் அட்லி ஆகியோருடன் இரண்டு படங்களில் ஒரே நேரத்தில் பணியாற்ற உள்ளார் என செய்திகள் வெளியாகியிருக்கிறது. இந்த படங்கள் பற்றிய அதிகாரப் பூர்வ அறிவிப்பு ஷாரு கானின் பிறந்தநாள் அன்று வெளிவரும் என எதிர்பார்க்கப்படுகிறது.

ஷாருக் கான் படத்தை முடித்த பிறகு தளபதியுடன் நான்காவது முறையாக கூட்டணி சேர உள்ளார் அட்லீ என கூறப்படுகிறது. அதற்கு முன்பு விஜய் இரண்டு படங்களில் நடித்து முடித்து விடுவார் என தெரிகிறது. அடுத்து சன் பிக்சர்ஸ் தயாரிப்பில் முருகதாஸ் இயக்கத்தில் ஒரு படத்தில் நடிக்கவுள்ளார் விஜய். அந்தப் படம் கொரோனா பிரச்சனை தீர்ந்த பிறகு தான் துவங்கும் என தெரிகிறது. இந்த படத்திற்கான முதற்கட்ட பணிகள் தற்போது நடைபெற்று வருவது குறிப்பிடத்தக்கது. இந்த படத்தை முடித்த பிறகு வெற்றிமாறனுடன் விஜய் கூட்டணி சேரலாம் என ஒரு தகவல் உலா வருவது குறிப்பிடத்தக்கது. இந்த இரண்டு படங்களையும் முடித்த பிறகு தான் விஜய் - அட்லி உடன் கூட்டணி சேரலாம் என தற்போது சினிமா வட்டாரத்தில் பேசிக்கொள்கின்றனர்.

இருப்பினும் விஜய்யின் அடுத்த படங்கள் பற்றி செய்திகள் மற்றும் வதந்திகள் வருவது இது முதல் முறை அல்ல என்பதால் அட்லி - விஜய் மீண்டும் இணைவார்களா என்பது அதிகாரபூர்வ தகவல் வெளியானதால் மட்டுமே உறுதியாகும்.

அட்லீ ஷாருக் கானை வைத்து இயக்கவுள்ள படம் முழுக்க முழுக்க கமர்ஷியலாக இருக்கும் என கூறப்படுகிறது. தமிழ் சினிமா ரசிகர்களை கவர்ந்த அட்லீ பாலிவுட் சினிமாவில் ஜொலிப்பாரா என்கிற எதிர்பார்ப்பும் அனைவர் மத்தியிலும் எழுந்திருக்கிறது.