Dhruv: இது என்னடா துருவ்-க்கு வந்த சோதனை: மீண்டும் புதுப்பொழிவுடன் உருவாகும் வர்மா!

சியான் விக்ரமின் மகன் துருவ் விக்ரம் நடிப்பில் வெளியீட்டிற்கு காத்திருந்த நிலையில், வர்மா படம் கைவிடப்பட்டுள்ளதாக தயாரிப்பு நிறுவனம் அறிவித்துள்ளது.

கடந்தாண்டு தெலுங்கு சினிமாவில் சக்கைபோடு போட்ட படம் அர்ஜுன் ரெட்டி. விஜய் தேவரகொண்டா நடித்திருந்த இந்தப் படத்தை இயக்குனர் பாலா தமிழில் ரீமேக் செய்தார். வர்மா என்ற பெயரில் உருவான இப்படத்தில், சியான் விக்ரமின் மகன் துருவ் ஹீரோவாகவும், வங்காள நடிகை மேகா ஹீரோயினாகவும் நடித்திருந்தனர். இந்த நிலையில், வரும் காதலர் தினத்தை முன்னிட்டு திரைக்கு வரும் என்று ஏற்கனவே அறிவிக்கப்பட்டது.

எனினும், அப்போது கார்த்தியின் தேவ், ஜிவி பிரகாஷின் 100% காதல் ஆகிய படங்கள் திரைக்கு வருவதால், இப்படத்தின் வெளியீடு தள்ளிவைக்கப்பட்டது. இந்த நிலையில், படம் கைவிடப்பட்டுள்ளதாக இப்படத்தை தயாரித்த இ4 எண்டர்டெயின்மெண்ட் நிறுவனம் அறிவித்துள்ளது. இது குறித்து தயாரிப்பு நிறுவனம் வெளியிட்டுள்ள அறிவிப்பில் கூறியிருப்பதாவது:

அர்ஜூன் ரெட்டி படத்திற்கும் பாலா எடுத்துள்ள வர்மா படத்திற்கு நிறைய கிரியேட்டிங் வித்தியாசங்கள் இருப்பதாலும், படத்தில் இன்னும் நிறைய மாற்றங்கள் செய்ய வேண்டும் என்பதாலும் இப்படம் கைவிடப்பட்டுள்ளது. தொடர்ந்து இதே கதையில், வேறு இயக்குனர், நடிகர், நடிகைகளுடன் இப்படம் புதுப்பொழிவுடன் உருவாகும் என்றும் வரும் ஜூன் மாதம் இப்படத்தை வெளியிட இருப்பதாகவும் தயாரிப்பு நிறுவனம் தெரிவித்துள்ளது. இப்படத்தில் மீண்டும் துருவ் ஹீரோவாக நடிக்க வாய்ப்பிருப்பதாக கூறப்படுகிறது என்பது குறிப்பிடத்தக்கது.