‘அருவி’ டிசம்பர் 1ல் ரிலீஸ்!

எஸ்.ஆர்.பிரபு தயாரிப்பில் உருவாகியுள்ள ‘அருவி’ படம் டிசம்பர் 1ம் தேதி தியேட்டர்களில் வெளியாகவுள்ளது.

‘ஜோக்கர்’, ‘காஷ்மோரா’, ‘கூட்டத்தில் ஒருத்தன்’ மற்றும் ‘தீரன் அதிகாரம் ஒன்று’ ஆகிய படங்களை தயாரித்தவர் எஸ்.ஆர்.பிரபு. புதுமுக இயககுனர் அருண் பிரபு புருஷோத்தமன் இயக்கிய ‘அருவி’ படத்தையும் இவரே தயாரித்துள்ளார்.

ஷாங்காய் சர்வதேச திரைப்பட விழா மற்றும் மும்பை, பஞ்சாப், டெல்லி, கேரளா உள்ளிட்ட பல்வேறு திரைப்பட விழாக்களில் இப்படம் திரையிடப்பட்டு, விமர்சகர்கள் மத்தியில் வரவேற்பைப் பெற்றுள்ளது. சமீபத்தில் சென்னையில் சிலருக்கு திரையிட்டு காட்டியுள்ளார்கள். அவர்களும் படக்குழுவை வெகுவாக பாராட்டி இருக்கிறார்கள்.

சமூகப் பிரச்சினைகளை ஒரு பெண்ணின் பார்வையில் கூறும் இப்படத்தை இயக்கி இருக்கிறார் அறிமுக இயக்குநர் அருண் பிரபு புருஷோத்தமன். முற்றிலும் புதுமுகங்கள் நடித்துள்ள இப்படம் டிசம்பர் 1-ம் தேதி வெளியாகும் என படக்குழு அதிகாரப்பூர்வமாக அறிவித்திருக்கிறது.