Arya: கல்யாணத்துக்கு ரெடியான ஆர்யாவுக்கு ஜோடியான சாயிஷா: வரும் மார்ச் 10ம் தேதி திருமணம்!

ஆர்யா மற்றும் சாயிஷா ஜோடிக்கு வரும் மார்ச் மாதம் 10ம் தேதி திருமணம் நடக்கயிருப்பதாக தகவல் வெளியாகியுள்ளது.

தமிழ் சினிமாவில் வளர்ந்து வரும் நடிகர்களில் ஒருவராக இருப்பவர் நடிகர் ஆர்யா. வருடத்திற்கு ஓரிரு படங்களில் மட்டும் நடித்து அதனை வெளியிட்டு வருகிறார். இவரது நடிப்பில் வந்த ராஜா ராணி என்ற படம் ரசிகர்களிடையே நல்ல வரவேற்பு பெற்றது. அதன் பிறகு சொல்லிக்கொள்ளும்படி எந்த படமும் அமையவில்லை.

இந்த நிலையில், தான் தனியார் தொலைக்காட்சியில் நடந்த எங்க வீட்டு மாப்பிள்ளை என்ற நிகழ்ச்சியின் மூலம் தற்போது ஆர்யாவின் திருமணம் உறுதியாகியுள்ளது. இதற்கு முன்னதாக ஆர்யாவின் நண்பரும், தயாரிப்பாளர் சங்க தலைவரும், நடிகர் சங்கத்தின் பொருளாளருமான விஷால் தனது திருமணம் குறித்து அதிகாரப்பூர்வமாக அறிவித்தார்.

இந்த நிலையில், கஜினிகாந்த் என்ற படத்தின் மூலம் சினிமாவில் தன்னுடன் ஜோடி சேர்ந்த சாயிஷாவை வாழ்க்கை துணையாக தேர்வு செய்துள்ளதாக தற்போது தகவல் வெளியாகியுள்ளது. மேலும், இப்படத்தின் மூலம் இருவரும் காதலித்து வந்ததாக கூறப்படுகிறது.

இதற்கிடையில், வரும் மார்ச் மாதம் 10ம் தேதி ஹைதராபாத்தில் வைத்து ஆர்யா – சாயிஷா திருமணம் செய்து கொள்ளப்போவதாக தகவல் வெளியாகியுள்ளது. இஸ்லாமிய முறைப்படி நடைபெறும் இந்தத் திருமணம் மார்ச் 9 மற்றும் 10 ஆகிய தேதிகளில் 2 நாட்கள் நடைபெறும் எனத் தெரிகிறது.

விரைவில் இது குறித்து முறையான அறிவிப்பு வெளியாகும் என்று எதிர்பார்க்கப்படுகிறது. இந்த திருமணத்திற்கு தமிழ் திரையுலகம் திரண்டு வந்து வாழ்த்து கூறும் என்பதால், பிரமாண்டமான திருவிழாவாக நடத்த ஏற்பாடுகள் செய்யப்படும் என்று எதிர்பார்க்கப்படுகிறது.