முத்து படத்துக்குப் பின்னர் பாகுபலி 2க்கு ஜப்பானில் வரவேற்பு!!

ஜப்பானில் ரஜினியின் முத்து படத்துக்குப் பின்னர் பாகுபலி 2 க்கு மோக வரவேற்பு கிடைத்துள்ளது.

இந்தியத் திரையுலகில் பெரும் வரவேற்பைப் பெற்ற படம் பாகுபலி 2. இந்தப் படம் வெளிநாடுகளிலும் திரையிடப்பட்டது. அந்த விதத்தில் கடந்த வருடம் டிசம்பர் மாதம் 29ம் தேதி ஜப்பான் நாட்டில் வெளியிடப்பட்டது. அங்கு ‘Baahubali: The Triumphant Return of the King’ என்ற பெயரில் வெளியானது. படத்தைப் பார்த்த ஜப்பான் ரசிகர்கள், படத்தில் இடம் பெற்றுள்ள கதாபாத்திரங்களால் மிகவும் ஈர்க்கப்பட்டுள்ளனர்.

ரஜினிகாந்த் நடித்த முத்து படத்திற்குப் பிறகு பாகுபலி 2 படத்திற்குத்தான் இப்படிப்பட்ட வரவேற்பு கிடைத்து வருகிறது என்கிறார்கள். படத்தின் வசூலைப் பற்றிக் கவலையில்லை, மக்கள் படத்தை எப்படி கொண்டாடி ரசிக்கிறார்கள் என்பதுதான் முக்கியம் என பாகுபலி 2 குழுவினர் ஜப்பான் ரசிகர்களின் கொண்டாட்டத்தில் மகிழ்ந்துள்ளனர்.