பெங்களூர் சர்வதேச திரைப்பட விழா 22ஆம் தேதி தொடங்குகிறது!

பெங்களூரில் சர்வதேச திரைப்பட விழா வரும் பிப்ரவரி 22ம் தேதி தொடங்க உள்ளது.

பெங்களூரில் 10வது சர்வதேச திரைப்பட விழா இம்மாதம் 22ம் தேதி தொடங்கி, மார்ச் 1ம் தேதி வரை நடைபெறவுள்ளது. இதில் 60 நாடுகளிலிருந்து தேர்ந்தெடுக்கப்பட்ட 200 படங்கள் திரையிடப்பட உள்ளன. தாய்லாந்து, ஜெர்மனி, லத்தீன் அமெரிக்கா நாடுகளைச் சேர்ந்த படங்கள் அதிக அளவில் திரையிடப்படுகிறது. ஒளிப்பதிவாளர் செழியன் இயக்கிய ‘டு லெட்’ என்ற தமிழ் படமும், அசோகமித்ரன் ஆவண படமும் இதில் திரையிடப்படுகிறது.

கர்நாடகாவில் சுட்டுக் கொல்லப்பட்ட பத்திரிகையாளர் கவுரி லங்கேஷின் ஆவணப்படமும் திரையிடப்படுகிறது. சர்வதேசம், ஆசியா, இந்தியா, கன்னடம் ஆகிய 4 பிரிவுகளில் போட்டியும் நடக்கிறது. இதில் வெற்றி பெறும் படங்களுக்கு மார்ச் 1ம் தேதி நடக்கும் நிறைவு விழாவில் கர்நாடக முதல்வர் சித்தராமைய்யா பரிசுகளை வழங்குவார் என்று அறிவிக்கப்பட்டுள்ளது.