‘16 வயதினிலே’ படத்தில் சப்பாணி கேரக்டரில் முதலில் நடிக்க இருந்தது இவர்தானாம்: பாரதிராஜாவே வெளியிட்ட தகவல்!

‘16 வயதினிலே’ படத்தில் கமல் நடித்த சப்பாணி கேரக்டரில் முதல் நடிக்க இருந்தது நடிகர் நாகேஷ்தான் என்று இயக்குனர் இமயம் பாரதிராஜா கூறியுள்ளார்.

ரஜினி, கமல், ஸ்ரீதேவி நடிப்பில் வெளியான படம் ‘16 வயதினிலே’. இந்தப் படம் இந்த மூவருக்கும் சினிமா பயணத்தில் ஒரு முக்கிய படமாக அமைந்தது. இந்தப் படத்தில் நடிகர் கமல்ஹாசன் சப்பாணி கேரக்டரில் நடித்திருப்பார். இந்த கேரக்டர் மக்களிடம் அதிகம் பேசப்பட்டது.

சமீபத்தில் ‘மரகதநாடு’ படத்தின் இசை வெளியீட்டு விழாவில் கலந்து கொண்ட பாரதிராஜா, ‘16 வயதினிலே’ படத்தில் இடம் பெற்ற சப்பாணி கேரக்டர் பற்றி பேசினார். ‘‘இந்த படத்தில் நடித்த நட்சத்திரங்களின் கேரக்டர்களைப் படத்தில் பார்க்கும்போது ஒரு விஷயம் எனக்கு தோன்றியது. கமல் அழகாக இருந்ததால் தான் நான் அவரை சப்பாணி வேடத்தில் நடிக்க தேர்வு செய்ததேன்.

அழகாக இருப்பதை சற்று அழுக்காக்கி காண்பிக்கும் போது தான் மக்களுக்கு அது பிடிக்கிறது. இந்தப் படத்தை பிளாக் அன்ட் ஒயிட்டில் எடுக்கும் முடிவில் இருந்தபோது நடிகர் நாகேஷைத்தான் சப்பாணியாக நடிக்க வைக்க முடிவு செய்திருந்தேன். அப்போது அவரைப் போட்டிருந்தால் எல்லோரும் தியேட்டரை விட்டு எழுந்து போயிருப்பார்கள். படத்தை கலரில் எடுத்ததால் நடிகர் கமலை தேர்வு செய்தேன்’ என்றார்.