Bigil TN Rights: பிகிலுக்கு ரூ.180 கோடி பட்ஜெட், 110 நாள் கால்ஷீட்!

தெறி, மெர்சல் ஆகிய படங்களைத் தொடர்ந்து அட்லி – விஜய் கூட்டணியில் உருவாகியுள்ள படம் பிகில். வரும் தீபாவளி பண்டிகையை முன்னிட்டு 25 ஆம் தேதி திரைக்கு வருகிறது. இதே தேதியில், தான் கார்த்தியின் கைதி படமும் திரைக்கு வருகிறது.

இதனால், அதிகப்படியான திரையரங்குகள் பிடிப்பதில் இரு படங்களுக்குமே போட்டி நிலவுகிறது. அதோடு, படங்களின் வசூலும் பாதிக்கப்படக்கூடும் என்று சொல்லப்படுகிறது. மெர்சலைப் போன்று இந்தப் படத்திலும் விஜய், ராயப்பன், மைக்கேல், பிகில் என்று 3 விதமான கதாபாத்திரங்களில் நடித்துள்ளார். இதன் மூலம் அட்லி படம் என்றாலே விஜய்க்கு ஒன்றுக்கு அதிகமான கதாபாத்திரம் கொடுக்கப்படுகிறது என்று கூறலாம்.

கபடி, கிரிக்கெட், கேரம் என்றெல்லாம் விளையாடிய விஜய் பிகில் படத்தின் மூலம் கால்பந்தும் விளையாடியுள்ளார். பெண்களின் கால்பந்து விளையாட்டை மையப்படுத்திய இப்படத்தில் விஜய்க்கு ஜோடியாக லேடி சூப்பர் ஸ்டார் நயன்தாரா ஏஞ்செல் என்ற கதாபாத்திரத்தில் பிசியோதெரபி படிக்கும் மாணவியாக நடித்துள்ளார்.


மேலும், இந்துஜா, ரெபா மோனிகா, வர்ஷா பொல்லம்மா, ஆனந்தராஜ், யோகி பாபு, ஜாக்கி ஷெராஃப், விவேக், கதிர், டேனியல் பாலாஜி ஆகியோர் உள்பட பலர் நடித்துள்ளனர். ஏஜிஎஸ் நிறுவனம் தயாரித்துள்ள இப்படத்திற்கு இசைப்புயல் ஏஆர் ரஹ்மான் இசையமைத்துள்ளார். இந்த நிலையில், இப்படத்திற்கு முதலில் ரூ.125 கோடி பட்ஜெட் ஒதுக்கப்பட்டுள்ளதாம். அதன் பிறகு ரூ.180 கோடிக்கு படத்தை படக்குழுவினர் முடித்துள்ளனராம்.

இதே போன்று இப்படத்திற்கு முதலில் 70 நாட்கள் கால்ஷீட் கொடுத்துள்ளார் விஜய். ஆனால் படப்பிடிப்பு நாட்கள் அதிகரிக்க கூடுதலாக 40 நாட்கள் கால்ஷீட் கொடுத்துள்ளாராம். ஆக மொத்தம் பிகில் படத்திற்காகவே விஜய் 110 நாட்கள் வரை கால்ஷீட் கொடுத்து தனது கடின உழைப்பை பிகிலுக்காக கொடுத்துள்ளாராம். இப்படம் நன்றாக வந்துள்ளதைத் தொடர்ந்து விஜய் அதிகளவில் சந்தோஷப்பட்டுள்ளாராம். இந்த தகவலை சினிமா விமர்சகர் ரமேஷ் பாலா தனது ட்விட்டர் பக்கத்தில் பதிவிட்டுள்ளார் என்பது குறிப்பிடத்தக்கது.

இப்படத்தின் இசை வெளியீட்டைத் தொடர்ந்து அண்மையில், டிரைலர் வெளியானது. இதுவரை 30 மில்லியனுக்கும் அதிகமானோர் பிகில் டிரைலரை பார்த்து மகிழ்ந்துள்ளனர்.