தமிழ் நடிகையின் செல்போன், பணம் கொள்ளை: தக் தக் கும்பலுக்கு போலீஸ் வலைவீச்சு!

டெல்லியில் தமிழ் நடிகையை தாக்கி பணத்தை கொள்ளையடித்துச் சென்ற கும்பலை போலீசார் தேடி வருகின்றனர்.

சென்னையைச் சேர்ந்தவர் நடிகை பர்ஹீன். இவர், கமல் ஹாசன் நடிப்பில் வந்த கலைஞன் என்ற படத்தில் நடித்துள்ளார். தொடர்ந்து ஒரு சில தமிழ் படங்களில் நடித்து வந்த பர்ஹீன், ஜான் தேரே நாம் என்ற படத்தின் மூலம் பாலிவுட்டில் அறிமுகமானார். இதையடுத்து, பாலிவுட் படங்களில் நடித்து வந்த பர்ஹீனுக்கு மலையாளம், கன்னடம் மொழிகளிலும் நடிக்கும் வாய்ப்பு கிடைத்து அங்கும் பல படங்களில் நடித்துள்ளார்.

இந்த நிலையில், இந்திய கிரிக்கெட் அணியின் முன்னாள் வீரர் மனோஜ் பிரபாகரை காதலித்து திருமணம் செய்து கொண்டார். இப்போது டெல்லியில் உள்ள சர்வபிரியா நகர் பகுதியில் வசித்து வருகிறார். பர்ஹீன் மற்றும் மனோஜ் பிரபாகருக்கு 2 மகன்கள் இருக்கின்றனர் என்பது குறிப்பிடத்தக்கது.

பர்ஹீன், தனது காரில் நேற்று பிற்பகலில் ஷாப்பிங் மால் ஒன்றிற்கு சென்றிருந்தார். அப்போது அவரது காரை பின் தொடர்ந்து சென்ற 4 பேர் கொண்ட மர்ம கும்பல், சிக்னல் அருகில் கார் கண்ணாடியை உடைக்க முயற்சித்துள்ளனர். இதில், சுதாரித்துக் கொண்ட் பர்ஹீன், காரை ஓரமாக நிறுத்திவிட்டு, கண்ணாடியை உடைக்க முயற்சித்தவர்களிடம் வாக்குவாதத்தில் ஈடுபட்டுள்ளார்.

இதற்கிடையில், பர்ஹீனின், செல்போன், பர்ஸ், அவரிடம் இருந்த ரூ.16 ஆயிரம் பணம் ஆகியவற்றை எடுத்துக்கொண்டு தப்ப முயற்சித்துள்ளனர். ஆனால், பர்ஹீன் அவர்களை தப்ப விடாமல் முயற்சிக்க, பர்ஹீனை தாக்கிவிட்டு 4 பேர் கொண்ட கும்பல் அங்கிருந்து தப்பிவிட்டனர். அப்போது, அங்கு வந்த ராணுவ வீரர், போலீசாருக்கு தகவல் கொடுத்தார். இதையடுத்து, சம்பவ இடத்திற்கு வந்த போலீசார் பர்ஹீனிடம் நடந்தவை குறித்து விசாரணை மேற்கொண்டனர்.

பின்னர், வழக்குப் பதிவு செய்த போலீசார் சிசிடிவி கேமரா உதவியோடு தப்பியோடிய கும்பலை தேடி வருகின்றனர். இந்த சம்பவத்தில் ஈடுபட்டவர்கள் தக் தக் கும்பல் என்பது தெரியவந்துள்ளது. மேலும், இவர்கள் சிக்னலில் இருக்கும் கார் கண்ணாடிகளை உடைத்து டிரைவர்களின் கவனத்தை திசை திருப்பி செல்போன்கள், பணம் ஆகியவற்றை கொள்ளையடிப்பதை வழக்கமாக கொண்டுள்ளனர் என்பது குறிப்பிடத்தக்கது.