மீண்டும் அமிதாப் தயாரிப்பில் நடிக்கும் தல அஜித்

நடிகர் அமிதாப் பச்சன் தயாரிப்பில் அட்லீ இயக்கும் படத்தில் தல அஜித் நடிக்கவுள்ளதாக தகவல் வெளியாகியுள்ளது.

‘ராஜா ராணி’ என்ற சூப்பர் ஹிட் படத்தை கொடுத்த அட்லி, அடுத்தப்படமே விஜய்யை வைத்து ‘தெறி’ எனும் மெகா ஹிட் படத்தை கொடுத்தவர். தற்போது ஜீவா நடிப்பில் ‘சங்கிலி புங்கிலி கதவ தொற’ என்ற படத்தை தயாரித்து வருகிறார்.

‘தெறி’ படத்திற்கு பிறகு அட்லீ, விஜய்யை வைத்து மீண்டும் ஒரு படத்தை இயக்கவிருப்பதாகவும், இது தெறி-2 படமாக இருக்கும் என்று தகவல் வெளியானது. இந்நிலையில் தற்போது அவர் தல அஜித்தை வைத்து ஒரு படம் இயக்கப்போவதாக செய்தி வெளியாகியிருக்கிறது. அண்மையில் அஜித்தை சந்தித்த அட்லி, கதை கூறியதாகவும், அது அஜித்துக்கு மிகவும் பிடித்துவிட்டதாகவும் கூறப்படுகிறது.

மேலும் இந்தப்படத்தை பாலிவுட்டின் ‘பிக் பி’ என போற்றப்படும் அமிதாப் பச்சன் தயாரிக்கவிருப்பதாகவும் கூறப்படுகிறது. அஜித் - அமிதாப் இணையப்போவது இது முதன்முறையல்ல, ஏற்கனவே 1996ம் ஆண்டு, ஜேடி ஜெர்ரி இயக்கத்தில், அஜித், விக்ரம் நடிப்பில் வெளியான ‘உல்லாசம்‘ படத்தை தயாரித்தவரும் அமிதாப் பச்சன். அப்போது பிரம்மாண்ட பட்ஜெட்டில் தயாரான இப்படம் எதிர்பார்த்த வெற்றியை பெறவில்லை. அதன்பின் தமிழில் பட தயாரிப்பிலும் அமிதாப் ஈடுபடவில்லை.

இந்நிலையில் 20 ஆண்டுகளுக்கு பிறகு மீண்டும் அஜீத் படம் மூலம் அமிதாப், தமிழ் பட தயாரிப்பில் களமிறங்க இருப்பதாக கோலிவுட்டில் பரபரப்பாக பேசப்படுகிறது. தற்போது அஜித், 3வது முறையாக சிவா இயக்கத்தில் ஒரு படத்தில் நடித்து வருகிறார். இது அஜித்தின் 57-வது படமாக உருவாகி வருகிறது. இந்தப்படத்தை தொடர்ந்து இது அஜித்தின் 58-வது படமாக இருக்கும் என்றும் கூறப்படுகிறது.