குழந்தைகள் படத்திற்கு 50 இடத்தில் வெட்டு: கிழித்தெறிந்த சென்சார் போர்டு!

டெல்லி: பாலிவுட்டில் வெளியாக உள்ள குழந்தைகள் கடத்தலை மையப்படுத்திய திரைப்படத்தில் 50 இடங்களில் வெட்டி சென்சார் போர்டு நடவடிக்கை மேற்கொண்டுள்ளது.

சமூக நன்னடத்தை கருத்துக்களை அழுத்தமாக பதிக்கும் திரைப்படங்களை கொண்டு வருவதில் பாலிவுட் சிறப்பாக பங்காற்றி வருகிறது.

சமீபத்தில் வெளியான ‘பிங்க்’ மற்றும் டாய்லெட் ஏக் பிரேம் கதா’ ஆகியவை வலுவான சமூக கருத்துக்களை முன்னிறுத்தின. இந்நிலையில் ‘லவ் சோனியா’(Love Soniya) என்ற பெயரில் புதிய படம் ஒன்று வெளியாக உள்ளது.

இது குழந்தைகள் கடத்தலை மையப்படுத்திய கதைக் கருவை கொண்டது. இப்படத்தை மத்திய திரைப்பட தணிக்கை வாரியம் ஆய்வு செய்தது. இப்படத்தில் மிருனல் தாகூர், மனோஜ் பாஜ்பாயி, ரிச்சா சத்தா, ராஜ்குமார் ராவ் மற்றும் பிரைடா பிண்டோ நடித்துள்ளனர்.

இந்நிலையில் படத்தில் இடம்பெற்றுள்ள மோசமான வார்த்தைகளை நீக்குமாறு தெரிவித்துள்ளது. மேலும் பாலியல் தொல்லை காட்சிகளை பெருமளவு வெட்டியுள்ளது. சுமார் 45 இடங்களில் வெட்டு விழுந்துள்ளது.

இதற்குப் பின்னரும் படத்திற்கு ‘A' சான்றிதழ் வழங்கப்பட்டுள்ளது. சமூக சீர்திருத்த கருத்துக்களை முன்வைக்கும் படங்களை, வெட்டு விழாத வகையில் உருவாக்குமாறு தணிக்கை குழுவினர் கேட்டுக் கொண்டுள்ளனர்.

லவ் சோனியா படத்தை இயக்குவதற்காக 12 ஆண்டுகள் காத்திருந்ததாக இயக்குநர் டாப்ரெஸ் நூரனி தெரிவித்துள்ளார். இந்த சூழலில் தணிக்கை குழுவின் முடிவால் மிகுந்த மன வருத்தத்திற்கு ஆளாகியுள்ளதாக கூறினார்.

இப்படத்திற்காக விபச்சாரத்தில் ஈடுபட்டுள்ளவர்களை சந்தித்து பேசியதாகவும், அவர்களின் இடங்கள், வாழ்க்கை முறை, வேதனை உள்ளிட்டவற்றை அறிந்து கொண்டதாகவும் குறிப்பிட்டார்.

இதுபோன்ற படங்களையே தாம் எப்போதும் இயக்க விரும்புவதாக கூறினார்.

CBFC orders 50 cuts for a film on child trafficking.