செல்லம்மா பாடகி ஜோனிடா காந்தியை ஹீரோயின் ஆக்கும் விக்னேஷ் சிவன்

விக்னேஷ் சிவன் தற்போது 'காத்துவாக்குல ரெண்டு காதல்' படத்தை இயக்கி வருகிறார். இயக்குவது மட்டுமில்லாமல், பாடலாசிரியராகவும் பணிபுரிந்து வரும் இவர், 'ரெளடி பிக்சர்ஸ்' என்ற நிறுவனத்தின் மூலம் தயாரிப்பாளராகவும் மாறியுள்ளார்.

நயன்தாரா, விக்னேஷ்சிவன் இணைந்து தங்களது, ரெளடி பிக்சர்ஸ் தயாரிப்பு நிறுனத்தின் சார்பில் பல படங்களை தயாரித்து வருகிறார்கள். ஏற்கனவே, 'ராக்கி', 'கூழாங்கல்', 'நெற்றிக்கண்' ஆகிய படங்களைத் தயாரித்து வரும் விக்னேஷ் சிவன், புதிய படமொன்றைச் சமீபத்தில் அறிவித்தார். 'வாக்கிங்/டாக்கிங் ஸ்டராபெர்ரி ஐஸ்கிரீம்' எனப் பெயரிடப்பட்டுள்ள இந்தப் படத்தை விக்னேஷ் சிவனிடம் “நானும் ரௌடி தான், தானா சேர்ந்த கூட்டம்” படங்களில் பணிபுரிந்த உதவியாளர் வினாயக் இயக்கி வருகிறார்.

இந்தப் படத்தின் நாயகன், நாயகி குறித்து எந்தவொரு தகவலையும் படக்குழுவினர் அறிவிக்கவில்லை. இந்நிலையில், இதில் யார் நடித்து வருகிறார்கள் என்ற தகவல் வெளியாகியுள்ளது.

இதில் 'சூரரைப் போற்று' படத்தில் நடித்த கே.கிருஷ்ணகுமார் நாயகனாக நடிக்க உள்ளாராம். சூர்யா நடித்த 'சூரரைப் போற்று’திரைப்படம் தற்போது ஆஸ்கார் விருதை நோக்கி பயணித்துக் கொண்டிருக்கும் நிலையில், இந்த படத்தில் பைலட்டாக நடித்த கிருஷ்ணகுமார் என்பவர் வாக்கிங்/டாக்கிங் ஸ்டராபெர்ரி ஐஸ்கிரீம் படத்தில் ஹீரோவாக நடிக்க ஒப்பந்தமாகியுள்ளார்.

இந்த படத்தில் நாயகியாக பிரபல பாடகி ஜோனிடா காந்தி நடிக்க உள்ளாராம். கடந்த சில தினங்களுக்கு முன்பு யுவன் சங்கர் ராஜா வெளியிட்ட 'டாப்பு டக்கர்' என்ற ஆல்பத்தில் பாடி உள்ளார் ஜொனிடா காந்தி. மேலும் சமீபத்தில் சிவகார்த்திகேயன் நடித்து வரும் 'டாக்டர்' படத்தில் 'செல்லம்மா' என்ற பாடலை பாடி இருந்தார். இந்த பாடல் மிகவும் வைரலானது. அந்தப் பாடல் வீடியோவில் ஜோனிடா காந்தி தோன்றியிருந்தார் என்பது குறிப்பிடத்தக்கது.

வித்தியாசமான ரொமான்ஸ் கதையம்சம் கொண்ட 'வாக்கிங்/டாக்கிங் ஸ்ட்ராபெர்ரி ஐஸ்கிரீம்' படத்தின் படப்பிடிப்பு இன்று பூஜையுடன் தொடங்கியது.


சென்னையில் முதற்கட்டப் படப்பிடிப்பை முடித்துவிட்டு, பாண்டிச்சேரியில் அடுத்தகட்டப் படப்பிடிப்பைத் துவங்கத் திட்டமிட்டுள்ளனர் படக்குழுவினர். இந்த படத்தில் நடிக்கும் மற்ற நடிகர்கள் மற்றும் தொழில்நுட்ப கலைஞர்கள் குறித்த அறிவிப்பு விரைவில் வெளியாகும் என்று எதிர்பார்க்கப்படுகிறது.