உங்கள் இடம் அப்படியே இருக்கிறது பங்காளி.. வடிவேலுவை அழைக்கும் பிரபல இயக்குனர்

வைகை புயல் நடிகர் வடிவேலுவின் 60வது பிறந்தநாள் இன்று. சமீபத்திய வருடங்களாக சினிமாவில் நடிப்பதை முற்றிலும் நிறுத்திவிட்டாலும், அவரது பழைய புகைப்படங்களை சமூக வலைத்தளங்களால் மீமாக தொடர்ந்து உலவி கொண்டு தான் இருக்கிறது. எனக்கே எண்டே கிடையாது என ஒரு காமெடியில் அவர் கூறுவது போலவே வடிவேலுவின் ஒப்பற்ற காமெடிக்கு இருக்கும் மதிப்பு சற்றும் குறையவே இல்லை.

வடிவேலுவின் பிறந்தநாளான இன்று பிரபலங்கள் பலரும் சமூகவலைத்தளங்களில் வாழ்த்து தெரிவித்து வருகிறார்கள். இயக்குனர் சேரன் பதிவிட்டு இருக்கும் ட்விட்டில் 'உங்களது இடம் அப்படியே இருக்கிறது' என தெரிவித்து இருக்கிறார்.

"வடிவேலு .. திரு நாகேஷ் அவர்களுக்கு பின் எனக்கு மிகவும் பிடித்த ஒரு காமெடி நடிகர்.. இன்று உலகம் முழுதும் மீம்ஸ் மூலமும் கொடிகட்டி பறக்கும் வடிவேலு அவர்களுக்கு பிறந்தநாள் வாழ்த்துக்கள். உங்கள் இடம் அப்படியே இருக்கிறது பங்காளி.. வாங்க மீண்டும் நடிக்க.." என சேரன் கூறி இருக்கிறார்.


சேரன் வடிவேலுவை வெற்றிக்கொடி கட்டு படத்தில் இயக்கி இருக்கிறார். வடிவேலு கெரியரில் மிக முக்கிய படங்களில் அதுவும் ஒன்று. துபாயில் இருந்து திரும்பி வந்தவராக வடிவேலு அதில் நடித்து இருப்பார். அதன் காமெடி காட்சிகள் ரசிகர்களால் கொண்டாடப்பட்டன. தற்போதும் அந்த காமெடி காட்சிகளின் புகைப்படங்கள் பல மீம்களிலும் நெட்டிசன்கள் பயன்படுத்துவதை பார்க்க முடியும்.

வடிவேலு கடைசியாக விஜய்யின் மெர்சல் படத்தில் தான் நடித்து இருந்தார். அந்த படத்தில் அதிகம் காமெடி இல்லை என்பதால் வடிவேலுவுக்கு அந்த படத்தில் அதிகம் வேலை இல்லாமல் இருந்தது. சர்ச்சைகள் காரணமாக சினிமாவில் இருந்து ஒதுங்கி இருக்கும் வடிவேலு விரைவில் கமல்ஹாசனின் தலைவன் இருக்கின்றான் படத்தில் நடிக்க உள்ளார். அந்த அறிவிப்பையும் வடிவேலுவே அதிகாரப்பூர்வமாக கூறியது குறிப்பிடத்தக்கது.

அது மட்டும் இன்றி வடிவேலு சிம்புவின் அடுத்த படத்திலும் நடிக்க உள்ளார் என உறுதிப்படுத்தப்படாத தகவல் ஒன்று சில மாதங்களுக்கு முன்பே வெளியாகி இருந்தது குறிப்பிடத்தக்கது. மிஷ்கின் சிம்பு படத்தில் தான் அவர் நடிக்கிறார் என கூறப்படுகிறது.