கொரோனா லாக்டவுன்: வறுமையில் இருக்கும் நடிகர்களுக்கு விவேக் செய்த உதவி

தினமும் வரும் வருமானத்தை நம்பி இருந்தவர்கள் தான் கொரோனா ஊரடங்கால் அதிகம் பாதிக்கப்பட்டுள்ளனர். குறிப்பாக சினிமா துறையை மட்டுமே நம்பி இருக்கும் பல ஆயிரம் தொழிலாளர்கள் ஊரடங்கு காரணமாக வேலை இழந்துள்ளனர்.

தற்போது ஏப்ரல் 14 வரை போடப்பட்டுள்ள ஊரடங்கு மேலும் நீடிக்கப்பட வாய்ப்பு உள்ளது. அது பற்றிய அறிவிப்பு இன்று அதிகாரபூர்வமாக வரும் என கூறப்படுகிறது.

இந்நிலையில் கொரோனாவால் வேலை இழந்துள்ள சினிமா துறையினருக்கு உதவும் விதமாக பல்வேறு நடிகர்களும் உதவி செய்து வருகின்றனர்.

காமெடி நடிகர் விவேக் ரூபாய் மூன்று லட்சத்தை நலிந்த கலைஞர்களுக்காக உதவித்தொகையாக கொடுத்துள்ளார். அது மட்டுமின்றி அவர் 100 மூட்டை அரிசியையும் வழங்கியுள்ளார்.

மேலும் நேற்று அரசு வெளியிட்டுள்ள அறிவிப்பில் நடிகர் சங்க உறுப்பினர்களுக்கு தலா 1000 ரூபாய் உதவி தொகையாக வழங்கப்படும் என அறிவித்துள்ளனர்.

மேலும் சமீபத்தில் நடிகர் யோகி பாபு 1250 கிலோ அரிசியை நடிகர் சங்க உறுப்பினர்களுக்கு நேரடியாக வழங்கியிருந்தார். நலிந்த கலைஞர்களிடம் அவரே சென்று அதை வழங்கிய புகைப்படங்களும் வெளிவந்திருந்தது.