darbar கடைசியில் முருகதாஸ் ரஜினியிடம் சொன்னது தான் நடந்திடுச்சு

ஏ. ஆர். முருகதாஸ் இயக்கத்தில் ரஜினிகாந்த் மும்பை போலீஸ் கமிஷனர் ஆதித்யா அருணாச்சலமாக நடித்த தர்பார் படம் கடந்த 9ம் தேதி வெளியாகி ரசிகர்களை கவர்ந்தது. ரஜினி பல ஆண்டுகள் கழித்து காக்கிச் சண்டை அணிந்து நடித்தார். அலெக்ஸ் பாண்டியன் படத்திற்கு பிறகு ரஜினி போலீஸ்காரராக நடித்தால் அந்த படம் ஓடாது என்கிற சென்டிமென்ட் இருந்த நிலையில் தர்பார் வெளியானது.

ஒரு ஹீரோ ராணுவ வீரராக நடித்தால் அந்த படம் ஓடாது என்றார்கள். ஆனால் நான் விஜய்யை வைத்து எடுத்த கத்தி படம் ஓடியது. அதனால் உங்களுக்கும் காக்கிச் சட்டை சென்டிமென்ட் ஒர்கஅவுட் ஆகாது என்று முருகதாஸ் ரஜினியிடம் கூறியிருந்தார். அதன்படி தான் நடந்துள்ளது. ஆனால் யாரும் எதிர்பாராவிதமாக படத்திற்கு வேறு பிரச்சனை வந்தது.

தர்பார் படத்தை பார்த்தவர்கள் கதையை எங்கய்யா காணோம் என்று தான் கேட்டார்கள். முருகதாஸ் ரஜினியை இளமையாக, மாஸாக காட்ட முயன்றதில் கதையை கோட்டைவிட்டு விட்டார் என்று விமர்சகர்கள் தெரிவித்தார்கள். மேலும் ரமணா படத்தை கொடுத்த முருகதாஸ் தானா தர்பாரை இயக்கியது என்பதை நம்பவே முடியவில்லை என்று பலரும் தெரிவித்தனர்.

கதையை காணவில்லை என்று விமர்சனம் வரும் என முருகதாஸ் எதிர்பார்த்திருக்க மாட்டார். ரஜினியை பல ஆண்டுகள் கழித்து பேட்ட படத்தில் இளமையாக, ஸ்டைலாக காட்டிய கார்த்திக் சுப்புராஜை யாரும் இப்படி விளாசவில்லை. ரஜினியின் தீவிர ரசிகரான முருகதாஸ் பார்த்து பார்த்து படம் எடுத்து பலரிடம் வாங்கிக் கட்டிக் கொண்டுள்ளார். இதை யாருமே எதிர்பார்க்கவில்லை.