Oscar Awards: கண்டிப்பாக அசுரனுக்கு ஆஸ்கர் கிடைக்கும்: தயாரிப்பாளர் தாணு!

ஆண்டுதோறும் கதை, வசனம், இயக்கம், நடிப்பு, இசை என்று பல்வேறு பிரிவுகளில் சிறந்து விளங்குபவர்களுக்கு ஆஸ்கர் விருது வழங்கப்பட்டு வருகிறது. அந்த வகையில், 2020 ஆம் ஆண்டுக்கான 92 ஆவது ஆஸ்கர் விருது வழங்கும் விழா வரும் பிப்ரவரி மாதம் 9 ஆம் தேதி அமெரிக்காவின் லாஸ் ஏஞ்சல்ஸ் நகரில் உள்ள டால்பி தியேட்டரில் நடைபெறவுள்ளது.

இதில், இந்த ஆண்டுக்கான சிறந்த இந்திய படங்களின் பட்டியல் நேற்று வெளியிடப்பட்டது. இந்தப் பட்டியலில் வட சென்னை, சூப்பர் டீலக்ஸ், ஒத்த செருப்பு ஆகிய தமிழ் படங்கள் உள்பட 28 இந்திய படங்கள் போட்டியிட்டன. ஆனால், அதில், ரன்வீர் சிங் மற்றும் அலியா பட் நடிப்பில் வந்த கல்லி பாய் படம் தேர்வு செய்யப்பட்டதாக அறிவிக்கப்பட்டது.

இந்த நிலையில், இந்த ஆண்டு ஆஸ்கர் விருது பரிந்துரை பட்டியலில் தனுஷின் வட சென்னை இருப்பது போன்று, அடுத்த வருடம் ஆஸ்கர் விருது பரிந்துரை பட்டியலில் அசுரன் கண்டிப்பாக இருக்கும் என்று இப்படத்தின் தயாரிப்பாளர் கலைப்புலி எஸ் தாணு தெரிவித்துள்ளார். ஏற்கனவே தனுஷ் தேசிய விருது உள்பட பல விருதுகளை பெற்ற நிலையில், விரைவில் ஆஸ்கர் விருதையும் பெறுவார் என்று இப்போதே எதிர்பார்க்கப்படுகிறது.

வெற்றி மாறன் இயக்கத்தில் தனுஷ் பொல்லாதவன், ஆடுகளம், வட சென்னை ஆகிய படங்களில் நடித்துள்ளார். இப்படங்களைத் தொடர்ந்து 4ஆவது முறையாக அசுரன் படத்தில் நடித்து முடித்துள்ளார். இரட்டை வேடங்களில் நடித்துள்ள தனுஷிற்கு ஜோடியாக மலையாள நடிகை மஞ்சு வாரியர் நடித்துள்ளார். வரும் அக்டோபர் 4 ஆம் தேதி இப்படம் திரைக்கு வருகிறது என்பது குறிப்பிடத்தக்கது.