நெற்றிக்கண் ரீமேக் பற்றி தனுஷின் முடிவு என்ன தெரியுமா?

நடிகர் தனுஷ் நடிப்பில் இந்த வருடம் பல படங்கள் அடுத்தடுத்து வெளியாகவுள்ளது. கார்த்திக் சுப்புராஜ், மாரி செல்வராஜ், கார்த்திக் நரேன் என வெற்றிப் பட இயக்குநர்கள் வரிசையாக தனுஷை வைத்து படத்தை இயக்கவிருக்கின்றனர். இதில் செல்வராகவன் படமும் இருக்கலாம் எனவும் கூறப்படுகிறது. இந்நிலையில்தான் நெற்றிக்கண் படத்தை தனுஷ் ரீமேக் செய்யவிருப்பதாக திடீரென தகவல் வெளியானது.

நெற்றிக் கண் படம் ரஜினிகாந்த் நடிப்பில் 1981ம் ஆண்டு வெளியாகி வெற்றி பெற்ற திரைப்படம். இதில் ரஜினி நடித்த கதாபாத்திரத்தில் நடிகர் தனுஷும், கதாநாயகியாக முன்னணி ஹீரோயின் ஒருவரையும் நடிக்க வைக்க திட்டமிடப்பட்டிருப்பதாகவும் ஒரு தகவல் வெளியாகியிருந்தது. பின் அது புரளி எனக் கூறப்பட்டாலும், அதற்கு இயக்குநர் மற்றும் நடிகர் விசு தரப்பிலிருந்து இதற்கு எதிர்ப்பு வந்தது. அதாவது, தன் அனுமதி இல்லாமல் இந்த படத்தை யாரும் ரீமேக் செய்யக்கூடாது என வீடியோ ஒன்றை வெளியிட்டார் விசு.

கவிதாலயாவிடம் மட்டும் அனுமதி பெற்று இந்த படத்தை ரீமேக் செய்யமுடியாது. தன்னிடமும் அனுமதி பெறவேண்டியது கட்டாயம் என அவர் கூறினார்.

இந்நிலையில், தனுஷ் இந்த பிரச்சனை குறித்து விசுவிடம் தொலைபேசியில் பேசி விளக்கம் அளித்ததாக தகவல் வெளியாகியுள்ளது. தனுஷ் தற்போது நெற்றிக்கண் படத்தை ரீமேக் செய்யும் திட்டத்தில் இல்லை எனவும், அது வெறும் புரளி எனவும் தெரிவித்ததாக கூறப்படுகிறது.

நடிகர் தனுஷ் தற்போது கர்ணன் படத்தில் நடித்து வருகிறார். இதைத் தொடர்ந்து இந்தி படத்தில் நடிக்கவிருப்பதாக தெரிகிறது.