சர்வதேச அளவில் 'கர்ணன்' படத்திற்கு கிடைத்த அங்கீகாரம்: உற்சாகத்தில் ரசிகர்கள்!

'பரியேரும் பெருமாள்' படம் மூலம் தமிழ் சினிமாவிற்கு அறிமுகமாகி தன்னுடைய இரண்டாவது படைப்பாக தனுஷ் நடிப்பில் 'கர்ணன்' படத்தை இயக்கினார் மாரி செல்வராஜ். ரசிகர்களின் ஏகப்பட்ட எதிர்பார்ப்புகளுக்கு மத்தியில் வெளியாகி, ரசிகர்களிடம் அமோக வரவேற்பை பெற்றது இந்தப்படம். இந்நிலையில் 'கர்ணன்' படம் ஃப்ராங்க்பர்டில் நடக்கும் திரைப்பட விழாவில் திரையிட தேர்வாகியுள்ளது..

மாரி செல்வராஜ் இயக்கத்தில் தனுஷ் நடித்த 'கர்ணன்' படம் கடந்த ஏப்ரல் 9ஆம் தேதி வெளியாகி திரையரங்குகளில் வெளியாகி இருந்தது. இந்தப்படத்தில் தனுஷுடன் , ராஜிஷா விஜய், யோகி பாபு, லால், கெளரி, பூ ராம், உள்ளிட்ட பலர் நடித்திருந்தனர். 'அசுரன்' படத்தின் வெற்றியை தொடர்ந்து கலைப்புலி எஸ் தாணுவே, இந்தப்படத்தையும் தயாரித்திருந்தார். சந்தோஷ் நாராயணன் இசையில், தேனீ ஈஸ்வர் ஒளிப்பதிவில் வெளியானது 'கர்ணன்' படம்.

திரையுலக பிரபலங்கள், ரசிகர்கள் என பலரும் கர்ணன் படத்தை கொண்டாடினார்கள். விமர்சனரீதியாக மட்டுமின்றி வசூல்ரீதியாவும் இந்தப்படம் சாதனை படைத்தது. கொரோனா அச்சத்தையும் கடந்து திரையரங்குகளில் கர்ணனுக்கு பெருமளவு ரசிகர்கள் திரண்டனர். ஆனால் கொரோனா இரண்டாம் அலை காரணமாக திரையிடப்பட்ட சில வாரங்களிலே படத்தை திரையரங்குகளில் இருந்து நிப்பாட்ட வேண்டிய சூழ்நிலை உருவானது.

'வலிமை' படம் புரிந்த புதிய சாதனை: உற்சாகத்தில் அஜித் ரசிகர்கள்!
அதனை தொடர்ந்து ஓடிடியிலும் கர்ணன் படம் வெளியானதும். சப் டைட்டில் உதவியுடன் இந்தியாவின் பிற மொழி ரசிகர்களையும் படம் சென்றடைந்தது. இந்திய அளவில் 'கர்ணன்' படத்திற்கு பல விமர்சனங்கள் எழுதப்பட்டன. இந்நிலையில் தற்போது சர்வதேச அளவில் 'கர்ணன்' படத்திற்கு அங்கீகாரம் கிடைத்துள்ளது.


ஜெர்மனியின் ஃப்ராங்க்பர்ட்டில் நடைபெறும் நியூ ஜெனரேஷன் இன்டிபென்டன்ட் இன்டியன் ஃபிலிம் பெஸ்டிவலில் திரையிட கர்ணன் படம் தேர்வாகியுள்ளது. இந்த செய்தியை இயக்குனர் மாரி செல்வராஜ் தனது ட்விட்டர் பக்கத்தில் பகிர்ந்துள்ளார். இதனை தனுஷ் ரசிகர்கள் தற்போது கொண்டாடி வருகின்றனர்.