லவ்வர்ஸ் டேவுக்கு வர்மா வராதாம்: தயாரிப்பாளர் மேத்தா!

பிப்ரவரி 14, காதலர் தினத்தன்று வெளியாக இருந்த ‘வர்மா அன்று வெளியாகவில்லை என்று படத்தின் தயாரிப்பாளர் மேத்தா கூறியுள்ளார்.

இயக்குனர் பாலா இயக்கத்தில் நடிகர் விக்ரமின் மகன் துருவ் சினிமாவில் அறிமுகமாகியுள்ள படம் ‘வர்மா. இந்தப் படம் வரும் பிப்ரவரி 14 காதலர் தினத்தன்று ரிலீஸாவதாக இருந்தது. தற்போது ரிலீஸ் தேதி ஒரு மாதத்துக்கும் மேல் தள்ளி வைத்திருப்பதாக அதன் தயாரிப்பாளர் அதிகாரபூர்வமாக அறிவித்திருக்கிறார்.

விஜய் தேவரகொண்டா நடிப்பில் தெலுங்கில் வெளியான படம் ‘அர்ஜுன் ரெட்டி. இந்தப்படம் 65 கோடி வரை லாபத்தை ஈட்டியுள்ளது. படத்தின் மொத்த செலவு வெறும் 5 கோடிதான். இந்நிலையில் இந்தப்படத்தை தமிழில் ரீமேக் செய்துள்ளார் இயக்குனர் பாலா. இந்தப் படத்தில் நடிகர் விக்ரம் மகன் துருவ் நாயகனாக அறிமுகமாகிறார். இந்தப் படத்தின் அனைத்து பணிகளும் ஏற்கெனவே முடிந்து மூன்று மாதங்களுக்கு மேலாகி விட்டது. ஆகையால் இந்தப் படம் காதலர் தினத்தன்று வெளியாவதாக அறிவிக்கப்பட்டிருந்தது.

இதே நாளில் கார்த்தியின் ‘தேவ் படமும், ஜி.வி.பிரகாஷின் ‘100% காதல் மற்றும் விமல் ‘களவாணி 2’ ஆகிய படங்களும் வெளியாகிறது. இந்நிலையில், நடிகர் விக்ரம் தனது மகன் துருவ் நடித்த முதல் படம் பலத்த போட்டிகளுக்கிடையில் ரிலீஸாவதை விரும்பவில்லை. ஆகையால் நடிகர் விக்ரமின் விருப்பத்தை நிறைவேற்றும் வகையில் படத்தயாரிப்பாளர் முகேஷ் ஆர்.மேத்தா படத்தை மார்ச் இறுதிக்கு தள்ளிவைத்திருப்பதாக தெரிவித்திருக்கிறார்.