சிஷ்யன் படத்தை வாங்கிய இயக்குனர்!

இயக்குனர் அமீர் தன்னிடம் உதவி இயக்குநராக பணியாற்றிய முத்து கோபால் இயக்கியுள்ள படத்தை வாங்கியுள்ளார்.

இயக்குனர் முத்து கோபால், இயக்குனர் அமீரிடம் பல படங்களில் உதவி இயக்குனராக பணியாற்றிவர். தற்போது இவர் சொந்தமாக ஒரு படத்தை தயாரித்து அதில் நடிக்கவும் செய்துள்ளார். படத்தில் முத்து கோபால் ஜோடியாக சாந்தினி நடித்துள்ளார். மேலும் படத்தில் ஜெயபிரகாஷ், அருள்தாஸ் ஆகியோர் முக்கிய கேரக்டரில் நடித்துள்ளனர்.


இது திருப்பூரில் உள்ள சாயப் பட்டறை கழிவுகள் அமராவதி ஆற்றில் கலந்து அதன் மூலம் அமராவதி ஆற்று பாசனத்தை நம்பியுள்ள விவசாயிகள் அடைந்துள்ள பாதிப்புகள், திருப்பூர், பொள்ளாச்சி, பகுதி மக்கள் எந்த அளவிற்கு சாயக் கழிவுகளால் பாதிக்கப்பட்டிருக்கிறார்கள் என்பதைப் பற்றிய கதை.

படத்தை சொந்தமாக தயாரித்த முத்து கோபாலுக்கு கடும் பொருளாதார நெருக்கடி ஏற்படவே மேற்கொண்டு எதுவும் செய்ய முடியாமல் தனது குரு அமீரிடம் வந்துள்ளார். 70 சதவீத படப்பிடிப்பு முடிந்திருந்த படத்தை அமீர் பார்த்துள்ளார்.சமூக அக்கறை கொண்ட படமாகவும் அதே நேரத்தில் ஒரு நல்ல பொழுதுபோக்கு சினிமாவாகவும் படம் உருவாகி இருப்பதை அறிந்தார். அதனால் தன் சிஷ்யன் படத்தை தானே வாங்க முடிவு செய்துள்ளார் அமீர்.

படத்திற்கு முத்து கோபால் வைத்திருந்த பெயரை மாற்றி கே.பாலச்சந்திரின் குடும்பத்தினர் அனுமதி வாங்கி ‘அச்சமில்லை அச்சமில்லை’ என்ற பெயர் சூட்டியுள்ளார். .”இனி சமூக பிரச்சினைகளை பேசும் படங்களில்தான் நடிப்பது, தயாரிப்பது, இயக்குவது என முடிவு செய்துள்ளேன். முத்து கோபாலின் படத்தை பார்த்ததும் அதன் சமூக நோக்கம் பிடித்த்திருந்தது. அதனால் நானே தயாரிப்பாளராகிவிட்டேன்” என்ற அமீர்,இந்த படத்தில் ஒரு கெளரவ தோற்றத்திலும் நடித்துள்ளார்.

Director Ameer buys his assistant's debue film