விஜய் சேதுபதிக்கு வில்லனாக மாறிய பிரபல இயக்குநர்

தமிழ் சினிமாவில் மிகக் குறைந்த காலகட்டத்தில் சிறந்த நடிகராகவும், முன்னணி நாயகனாகவும் தன்னை வளர்த்துக் கொண்டவர் விஜய் சேதுபதி. எவரும் நடிக்கத் தயங்கும் கதாப்பாத்திரங்களை ஏற்று எல்லோரையும் கவர்ந்து வருகிறார். சமீபத்தில் ஆஸ்திரேலியாவில் நடந்த இந்திய திரைப்பட விழாவில் 'சூப்பர் டீலக்ஸ்' படத்திற்காக சிறந்த நடிகர் விருதை வென்றுள்ளார்.

விஜய் சேதுபதி நடிக்கும் 'விஜய் சேதுபதி 33' படம் தற்போது துவங்கப்பட்டுள்ளது. இப்படத்தை இயக்குநர் எஸ் பி ஜனநாதனிடம் உதவி இயக்குநராக இருந்த, வெங்கட கிருஷ்ணா ரோகந்த் இயக்குகிறார். இப்படத்தில் மேகா ஆகாஷ் நாயகியாக நடிக்கிறார்.

'தடம்', 'தடையற தாக்க' படங்கள் மூலம் புகழ்பெற்ற இயக்குநர் மகிழ் திருமேனி முதல் முறையாக இப்படத்தில் வில்லனாக நடிக்கிறார். 'இமைக்கா நொடிகள்' படத்தில் வில்லனாக நடித்த பாலிவுட் இயக்குநர் அனுராக் காஷ்யப்பிற்கு அவர் தமிழில் குரல் கொடுத்திருந்தார். அவரது குரலுக்கு பல பாராட்டுக்கள் கிடைத்தது. அதனால் ஈர்க்கப்பட்ட இயக்குநர் தன் படத்தில் வில்லனாக நடிக்க அவரை வற்புறுத்தியுள்ளார். முதலில் நடிக்க மறுத்தவர் இயக்குநரின் தொடர் வற்புறுதலுக்குப் பின் கதை கேட்டுள்ளார். கதை அவருக்கு பிடித்து விடவே, உடனடியாக நடிக்க சம்மதித்துள்ளார்.

விஜய் சேதுபதிக்கு எதிரான வில்லனாக மகிழ் திருமேனியை பார்க்க சினிமா பிரபலங்களும், ரசிகர்களும் ஆவலாக உள்ளனர். இப்படத்தில் விஜய் சேதுபதி இசைக்கலைஞராக நடிக்கிறார். இப்படத்தின் படப்பிடிப்பு தற்போது துவங்கி உள்ளது.

ஒரே நேரத்தில் பல படங்களில் நடிப்பதை விஜய் சேதுபதி வழக்கமாக கொண்டுள்ளார். 'சங்கத்தமிழன்' படம் முடிந்த நிலையில், புதுமுக இயக்குநர் தீனதயாளன் இயக்கத்தில் 'துக்ளக் தர்பார்', எஸ் பி ஜனநாதன் இயகத்தில் 'லாபம்' ஆகிய படங்களில் நடித்து வருகிறார்.

'காக்கா முட்டை' இயக்குநர் மணிகண்டன் இயக்கத்தில் 'கடைசி விவசாயி' படம் இறுதிகட்ட பணிகளில் உள்ளது. இதனைத்தொடர்ந்து கிரிக்கெட் வீரர் முரளிதரனின் பயோபிக்கில் நடிக்க உள்ளார். மேலும் ஆமிர்கான் நடிக்கும் பாலிவுட படத்தில் ஒரு முக்கிய கதாப்பாத்திரத்தில் அவர் நடிக்க உள்ளது குறிப்பிடத்க்கது.