அவருக்கு பதில் இவர்...! மணிரத்னத்தின் படத்தில் இணைந்த பிரபல இயக்குநர்

புத்தம் புது காலை, பாவக்கதைகள், குட்டி ஸ்டோரி உள்ளிட்ட ஆந்தாலஜி திரைப்படங்களுக்கு ரசிகர்கள் மத்தியில் கிடைத்த வரவேற்பை தொடர்ந்து, இயக்குநர்கள் பலரின் கவனம் தற்போது ஆந்தாலஜி திரைப்படங்களுக்கு திரும்பியுள்ளது.. வெற்றிமாறன், சுதா கொங்கரோ, கௌதம் வாசுதேவ் மேனன், கார்த்திக் சுப்புராஜ் போன்ற பிரபல இயக்குநர்கள் ஏற்கனவே ஆந்தாலஜி திரைப்படங்களில் இணைந்து விட்டனர். இந்த வரிசையில் தற்போது புதிதாக இணைந்திருப்பவர் இயக்குநர் மணிரத்னம்.

'பொன்னியன் செல்வன்' திரைப்பட வேலைகளில் பிசியாக இருக்கும் மணிரத்னம், இயக்குநராக அல்லாமல் தயாரிப்பாளராக ஒரு ஆந்தாலஜி மூவியை எடுக்க உள்ளார். 9 இயக்குநர்கள், 9 படங்கள் என பிரமாண்டமாக 'நவரசா' எனும் தலைப்பில் ஒரு ஆந்தாலஜி மூவியை தயாரித்து வருகிறார். மணிரத்னத்துடன் இணைந்து , ஜெயேந்திர பஞ்சாபகேசனும் இந்த படத்தை தயாரிக்கின்றனர்.

கெளதம் மேனன், ஹலிதா ஷமீம், கே.வி. ஆனந்த், கார்த்திக் சுப்புராஜ், பொன்ராம், பிஜாய் நம்பியார், அரவிந்த் சாமி மற்றும் ரதீந்திரன் ஆர். பிரசாத் உள்ளிட்ட 9 இயக்குநர்கள் 9 குறும்படங்களை இயக்கி வருகின்றனர் என்கின்ற செய்தி ஏற்கனவே ரசிகர்கள் அறிந்த ஒன்று... இந்த வெப்தொடர் விரைவில் நெட்பிளிக்ஸில் வெளியாகும் என எதிர்பார்க்கப்பட்ட நிலையில், தற்போது இயக்குநர் கேவி ஆனந்த், இந்த தொடரில் இருந்து வெளிவந்து விட்டதாக செய்திகள் கசிந்துள்ளன.

இந்நிலையில் கேவி ஆனந்த்திற்கு பதிலாக இந்த வெப் சீரிஸில் இயக்குநர் வசந்த் புதிய தொடர் ஒன்றை இயக்க போவாதாக தகவல்கள் வந்துள்ளன. மேலு‌ம் இந்த தொடரில் 'அருவி' அதிதி முக்கிய கதாபாத்திரம் ஒன்றில் நடிக்க போவதாகவும் கூறப்படுகிறது.. சமீபத்தில் விஜய் சேதுபதியுடன் அதிதி இணைந்து நடித்த 'குட்டி ஸ்டோரி' திரைப்படம் ரசிகர்களிடம் நல்ல வரவேற்பை பெற்றது குறிப்பிடத்தக்கது.. இதுகுறித்த முறையான அறிவிப்புகள் விரைவில் வெளியாகும் என்றும் எதிர்பார்க்கப்படுகிறது.

சூர்யா, விஜய்சேதுபதி, சித்தார்த், அரவிந்த் சாமி, பாபி சிம்ஹா, பிரகாஷ் ராஜ், கெளதம் கார்த்திக், அசோக் செல்வன், நித்யா மேனன், ரோபோ சங்கர், பார்வதி, அம்மு அபிராமி, பூர்ணா, விக்ராந்த், ஐஸ்வர்யா ராஜேஷ், அழகம் பெருமாள், ரித்விகா என மிகப்பெரிய நட்சத்திர பட்டாளமே இந்த 9 கதைகளில் நடித்துள்ளனர்.

காக்கா காக்கா, வாரணம் ஆயிரம் வெற்றிப்படங்களை தந்த கௌதமும், சூர்யாவும் மூன்றாவது முறையாக 'நவரசா' வில் இணைகின்றனர்.. இந்த திரைப்படம் பற்றிய அறிவிப்பு, ஏற்கனவே ரசிகர்களுக்கு எதிர்பார்ப்பை கிளப்பியிருந்த நிலையில், இதில் தற்போது இயக்குநர் வசந்தும் இணைய போகிறார் என்கின்ற செய்தி, ரசிகர்களின் எதிர்பார்ப்பை மேலும் அதிகரித்துள்ளது.