Sridevi ஜெயலலிதா பிறந்தநாள், ஸ்ரீதேவி நினைவு நாள்: 2 பேரையும் மறக்கத் தான் முடியுமா?

மறைந்த முன்னாள் முதல்வர் ஜெயலலிதாவின் பிறந்தநாளான இன்று அரசியல் கட்சியினரும், திரையுலக பிரபலங்களும் அவரை நினைவுகூர்ந்து சமூக வலைதளங்களில் போஸ்ட் போட்டுக் கொண்டிருக்கிறார்கள். இரும்பு பெண்மணி, எங்களுக்கு எல்லாம் இன்ஸ்பிரேஷன் என பலரும் தெரிவித்து வருகிறார்கள். எத்தனை முதல்வர்கள் வந்தாலும் ஜெயலலிதா அம்மாவை போன்று வராது என்று அவரின் ஆதரவாளர்கள் கூறியுள்ளனர்.

தமிழ் திரையுலகில் இருந்து பாலிவுட்டுக்கு சென்று சூப்பர் ஸ்டார் என்கிற அந்தஸ்தை பெற்ற ஸ்ரீதேவி இறந்து இன்றுடன் 3 ஆண்டுகள் ஆகிறது. நாத்தனார் மகன் மோஹித் மர்வாவின் திருமணத்தில் கலந்து கொள்ள துபாய் சென்ற ஸ்ரீதேவி, ஹோட்டல் அறையில் இருந்த குளியல் தொட்டி நீரில் மூழ்கி இறந்தார். அவர் குளியல் தொட்டி நீரில் மூழ்கி இறந்துவிட்டார் என்பதை நம்ப பலரும் தயாராக இல்லை. ஸ்ரீதேவியின் மரணத்தில் மர்மம் இருப்பதாக இன்று வரை பேசப்படுகிறது.

ஸ்ரீதேவியின் நினைவு நாளையொட்டி அவரின் கணவரும், தயாரிப்பாளருமான போனி கபூர், மகள்கள் ஜான்வி மற்றும் குஷி ஆகியோர் சென்னைக்கு வந்து திதி கொடுத்துள்ளனர். சென்னையில் இருக்கும் ஸ்ரீதேவியின் வீட்டில் கடந்த திங்கட்கிழமை பூஜை நடத்தப்பட்டது. ஸ்ரீதேவியின் நினைவு நாளான இன்று அவர் நடித்த படங்கள் குறித்து ரசிகர்கள் பேசிக் கொண்டிருக்கிறார்கள். மேலும் ஸ்ரீதேவியின் புகைப்படங்களை ஷேர் செய்து வருகிறார்கள்.

ஸ்ரீதேவியின் மூத்த மகள் ஜான்வி கபூர் தடக் படம் மூலம் நடிகையானார். அந்த படத்தின் ஷூட்டிங் துவங்கியபோது ஸ்ரீதேவி இருந்தார். ஆனால் படம் ரிலீஸானபோது அவர் உயிருடன் இல்லை. ஸ்ரீதேவி இறந்தபோது ஜான்வி தடக் படப்பிடிப்பில் இருந்தார். ஷூட்டிங் இருந்ததால் ஜான்வி தன் அம்மாவுடன் துபாய் செல்லவில்லை. ஜான்வி தன் அம்மாவின் புகைப்படங்களை அவ்வப்போது இன்ஸ்டாகிராமில் போஸ்ட் செய்து வருகிறார். ஆனால் சமூக வலைதளவாசிகளோ அவர் ஸ்ரீதேவியை வைத்து விளம்பரம் தேடுவதாக கிண்டல் செய்கிறார்கள்.