இந்தியாவில் அதிக ஊதியம் பெறும் நடிகர் அக்‌ஷய் குமார்- சல்மான் கானுக்கு பின்னடைவு

இந்தியாவில் அதிக ஊதியம் பெறும் நடிகர்களாக பாலிவுட் கதாநாயகர்கள் அக்‌ஷய் குமார் மற்றும் சல்மான் கானை தேர்வு செய்துள்ளது ஃபோர்ப்ஸ் பத்திரிக்கை.

உலகளவில் விற்பனையாகி வரும் வணிக மாதயிதழான ஃபோர்ப்ஸ், பல தரப்பட்ட துறை சார்ந்த பிரபலங்களின் சொத்து மதிப்பு விவரங்களை ஆண்டுதோறும் வெளியிட்டு வருகிறது.

இம்மாத பதிப்பில் ஃபோர்ப்ஸ் இதழ், 2018ம் ஆண்டில் உலகளவில் அதிகம் சம்பாதிக்கும் முதல் 100 நடிகர்கள் பட்டியலை வெளியிட்டுள்ளது. அதில் ஹாலிவுட் நடிகர் ஜியார் க்ளூனி 239 மில்லியன் அமெரிக்க டாலருடன் முதலிடத்தில் உள்ளார்.

அவரை தொடர்ந்து ’ராக்’ ட்வைன் ஜான்சன் 124 மில்லியன் மற்றும் மூத்த நடிகர் ராபர்ட் டவுனி ஜூனியர் 81 மில்லியன் பெற்று முறையே இரண்டு மற்றும் மூன்றாம் இடங்களை பிடித்துள்ளனர்.

ஜாக்கி சான், வில் ஸ்மித் உள்ளிட்டோர் இடம்பெற்றுள்ள இந்த பட்டியலில், இந்தியாவை சேர்ந்த பாலிவுட் கதாநாயகர்கள் அக்‌ஷய் குமார் மற்றும் சல்மான் கார் ஆகியோர் டாப் 10 வரிசையை பிடித்துள்ளனர்.

ஃபோர்ப்ஸ் வெளியிட்டுள்ள 2018 உலகில் அதிகம் சம்பாதிக்கும் நடிகர்களுக்கான வரிசையில் அக்‌ஷய் குமார் 40.5 மில்லியனுடன் 7வது இடத்திலும், சல்மான் கான் 38.5 மில்லியனுடன் 9வது இடத்திலும் இடம்பெற்றுள்ளனர்.

அக்‌ஷய் குமாரை விட இந்திய திரையுலகில் செல்வாக்கு பெற்ற நடிகராக அறியப்படும் சல்மான் கான், பொருளாதார நிலையில் அவருக்கு பின் தங்கியிருப்பது பலரையும் ஆச்சர்யமடைய செய்துள்ளது.

எனினும் ஒரு வருடத்தில் அக்‌ஷய் குமார் நடிக்கும் படங்களை விட சல்மான் கான் நடிக்கும் படங்களின் வரவு குறைவு என்பதால், இந்த வித்தியாசம் ஏற்பட்டிருக்கலாம் என திரைப்பட விமர்சகர்கள் கருத்து தெரிவித்துள்ளனர்.

ஆனால் படத்தின் வசூலில் இந்தியாவிலேயே சல்மான் கான் தான் கில்லி என்பது வேறு கதை. அவரது படத்திற்கு கிடைக்கும் ஓப்பனிங் இந்தியாவில் வேறு எந்த நடிகர்களின் படங்களுக்கும் கிடைப்பதில்லை என்பது நிதர்சனம்.

இந்த பட்டியலில் மேலும் ஹாலிவுட்டின் முன்னணி நடிகர்களான வில் ஸ்மித், அடாம் சாண்ட்லர், கிறிஸ் ஈவென்ஸ், இளம் நடிகர் கிறிஸ் ஹெம்ஸ்வொர்த் உள்ளிட்டோர் இடம்பெற்றுள்ளனர்.

ஃபோர்ப்ஸ் வெளியிட்டுள்ள 2018ம் ஆண்டின் அதிக ஊதியம் பெறும் நடிகர்களின் பட்டியலில் முதல் 100 இடங்களில் தமிழ் நடிகர்கள் யாரும் இடம்பெறவில்லை என்பது குறிப்பிடத்தக்கது.