ஜி. வி. பிரகாஷுக்கு வில்லனான கவுதம் மேனன்

கே ப்ரொடக்ஷன்ஸ் சார்பில் எஸ். என். ராஜராஜன், ஜி.வி. பிரகாஷ் குமார் நடிக்கும் புதிய படத்தை தயாரிக்கிறார். இந்த படத்தின் மூலம் இயக்குநர் வெற்றிமாறனிடம் உதவியாளராக பணிபுரிந்த மதிமாறன் புகழேந்தி இயக்குநராக அறிமுகமாகிறார்.

ஜி.வி. பிரகாஷுக்கு ஜோடியாக வர்ஷா பொல்லம்மா நடிக்க இருக்கிறார். இவர் சீமதுரை, 96, பிகில் உள்ளிட்ட படங்களில் நடித்தவர். இவர்களுடன், இளைஞர்களுக்கு மிகவும் பிடித்த ஸ்டைலிஷ் இயக்குநரான கவுதம் மேனன் வில்லனாக இணைந்திருக்கிறார். ஜி.வி.பிரகாஷுடன் கவுதம் மேனன் இணைந்து பணியாற்றுவது இதுவே முதல் முறை. மேலும் முக்கிய கதாபாத்திரங்களில் வாகை சந்திரசேகர் மற்றும் அறிமுக நடிகர் குணா நடிக்கிறார்கள்.

கவுதம் மேனன் இயக்கிய படங்கள் பணப் பிரச்சனைகளில் சிக்கியுள்ளதால், அவர் மிகுந்த நிதி நெருக்கடியில் உள்ளதாக தெரிகிறது. ஆதலால் அவர் தனக்கு வரும் நடிப்பு வாய்ப்புகளில் கவனம் செலுத்தி வருகிறார். கோலி சோடா 2 படத்தில் சிறிய கதாப்பாத்திரத்தில் நடித்தவர் தற்போது சிபிராஜின் 'வால்டர்' படத்தில் முக்கிய கதாப்பாத்திரத்தில் நடிக்கிறார். இதனைத் தொடர்ந்து இப்போது ஜி.வி. பிரகாஷுக்கு வில்லனாகியுள்ளார். இனி கவுதம் மேனனை நடிகராக தோடர்ந்து பார்க்கலாம் என சினிமா வட்டாரம் தெரிவித்து வருகிறது.

ஜி.வி. பிரகாஷ் இசையமைக்கும் இந்த படத்திற்கு விஷ்ணு ரங்கசாமி ஒளிப்பதிவு செய்ய இருக்கிறார். இவர் அண்ணனுக்கு ஜே, வெள்ளை யானை படங்களில் ஒளிப்பதிவாளராக பணிபுரிந்தவர். படத்தொகுப்பை எஸ். இளையராஜா கவனிக்கிறார்.

இப்படத்தில் ஜி.வி. பிரகாஷ் கல்லூரி மாணவராக நடிக்கிறார். ஒரு மாணவனுக்கு கல்லூரிக்கு வெளியே நடக்கும் இன்னல்களை ஆக்ஷன் கலந்து திரைக்கதையாக உருவாக்கி இருக்கிறார்கள். காதல், எமோஷன், ஆக்ஷன் என முழுக்க முழுக்க கமர்ஷியல் படமாக தயாராக இருக்கிறது.