‘நரகாசுரன்’ படத்தை விட்டு விலகிய கௌதம் மேனன்!?

நரேன் கார்த்திகேயன் இயக்கத்தில் உருவான ‘நரகாசுரன்’ படத்திலிருந்து இயக்குனர் கௌதம் மேனன் விலகி விட்டதாக கூறப்படுகிறது.

தமிழ் சினிமாவில் முன்னணி இயக்குனர்களில் ஒருவராக இருப்பவர் நரேன் கார்த்திகேயன். இவர் இயக்கத்தில் கடந்த ஆண்டு வெளியான படம் ‘துருவங்கள் 16’. இந்தப் படத்தை அடுத்து நரேன், தற்போது ‘நரகாசுரன்’ படத்தை இயக்கி வருகிறார். இந்தப் படத்தை பிரபல இயக்குனர் கௌதம் மேனன் தயாரித்து வந்தார். இந்தப் படத்திற்காக அவர் முதலீடு எதுவும் போடாமல் படத்தை விற்று, வந்தப் பணத்தை அவர் இயக்கி வரும் மற்றப் படங்களுக்கு பயன்படுத்திக் கொண்டதாக அவர் மீது நரேன் குற்றம் சாட்டினார்.

இதனால் இந்த படத்தின் படப்பிடிப்பு முடிந்து பல மாதங்கள் ஆகியும் டப்பிங் உள்பட மற்ற பணிகளை தொடங்க முடியாமல் சிக்கல் ஏற்பட்டது. இதன் பின்னர் இருதரப்பும் நடத்திய பேச்சுவார்த்தையில் உடன்பாடு ஏற்பட்டதாகவும் இந்த படத்தில் இருந்து கௌதம் மேனன் விலகிவிட்டதாகவும் தெரிகிறது.

இதனையடுத்து இந்த படத்தின் மற்ற பணிகள் முடிவடைந்து, சென்சார் அதிகாரிகள் படத்துக்கு யு/ஏ சான்றிதழும் வழங்கிவிட்டனர். இந்த நிலையில் தற்போது வெளியாகியுள்ள இந்த படத்தின் போஸ்டரில் கௌதம் மேனன் பெயர் இடம்பெறாதது குறிப்பிடத்தக்கது.