Thalapathy 63: எதிர்பார்ப்பை ஏற்படுத்தி விடாதே டா: தெறித்து ஓடிய ராஷ்மிகா!

சர்கார் படத்தைத் தொடர்ந்து அட்லி இயக்கத்தில் விஜய் நடிக்கும் 63வது படத்தில் ராஷ்மிகா நடிப்பது குறித்து விளக்கம் கொடுத்துள்ளார்.

இயக்குனர் ஏ.ஆர்.முருகதாஸ் இயக்கத்தில் தளபதி விஜய் நடிப்பில் கடந்த 6ம் தேதி வெளியாகி ரசிகர்களிடையே நல்ல வரவேற்பைப் பெற்ற படம் சர்கார். அரசியல் பின்னணிக் கதையை மையப்படுத்திய இப்படம் அரசியல் கட்சியினருரிடையே பெரும் தாக்கத்தை ஏற்படுத்தியது. எனினும், வசூல் ரீதியாக இப்படம் ரூ.200 கோடி வரை வசூல் குவித்துள்ளது.

இந்த நிலையில், இப்படத்தைத் தொடர்ந்து தனது 63ஆவது படத்திற்காக தளபதி விஜய் தெறி படத்தின் இயக்குனர் அட்லியுடன் 3ஆவது முறையாக இணைந்துள்ளார். இந்தக் கூட்டணியில் உருவாகும் புதிய படத்தை ஏஜிஎஸ் புரோடக்‌ஷன் நிறுவனம் தயாரிக்கிறது. தற்போது இப்படத்தின் படப்பிடிப்பு கடந்த 14ம் தேதி மைலாப்பூரில் உள்ள ஒரு கோயிலில் பூஜையுடன் தொடங்கியுள்ளது. இப்படத்திற்கு இசையமைப்பாளர் ஏ.ஆர்.ரஹ்மான் இசையமைக்கிறார் என்பது குறிப்பிடத்தக்கது. மேலும், இப்படம் அடுத்தாண்டு தீபாவளி பண்டிகையை முன்னிட்டு வெளிவரும் என்று ஏஜிஎஸ் புரோடக்‌ஷன் நிறுவனத்தின் மூலம் தெரிவிக்கப்பட்டுள்ளது.

இப்படம் குறித்து ஏஜிஎஸ் நிறுவனம் வெளியிட்டுள்ள செய்திக்குறிப்பில் கூறியிருப்பதாவது: இதுவரை வெளிவந்த தளபதி விஜய்யின் படங்களில் இருந்து இப்படம் முற்றிலும் மாறுபட்ட ஒன்றாக இருக்கும். கல்பாத்தி எஸ் அகோரம், கல்பாத்தி எஸ் கணேஷ், கல்பாத்தி எஸ்.சுரேஷ் ஆகியோர் இப்படத்தை தயாரிக்கின்றனர்.

ஏராளமான முன்னணி நடிகர்கள், நடிகைகள், இந்தியாவின் தலைசிறந்த தொழில்நுட்ப கலைஞர்கள் மற்றும் மிக பிரமாண்டமான பொருட்செலவில் உருவாகும் தளபதி 63 படம் அவரது ரசிகர்களின் எதிர்பார்ப்பை பூர்த்தி செய்யும் மாபெரும் பொழுது போக்கு திரைப்படமாக இருக்கும் என்று தெரிவிக்கப்பட்டுள்ளது.

இந்த நிலையில், இப்படத்தில் விஜய்க்கு ஜோடியாக யார் நடிப்பார்கள் என்ற எதிர்பார்ப்பு அதிகரித்து வருகிறது. இதற்கிடையில், சமந்தா, நயன்தாரா, காஜல் அகர்வால் ஆகியோரது பெயர்கள் அடிபட்டன. இந்தப் பட்டியலில், கீதா கோவிந்தம் படத்தின் ஹீரோயின் ராஷ்மிகா மந்தனாவின் பெயரும் இடம் பெற்றிருந்தது.

இது குறித்து ரசிகர் ஒருவர் கேட்ட கேள்விக்கு ராஷ்மிகா கூறுகையில், டேய் எதிர்பார்ப்பை ஏற்படுத்தி விடாதே டா என்று நகைச்சுவையாக கூறியுள்ளார்.