கனா படத்தின் புதிய போஸ்டர் வெளியீடு: படம் டிசம்பரில் திரைக்கு வரும்: சிவகார்த்திகேயன்!

தனது சொந்த தயாரிப்பு நிறுவனத்தின் மூலம், கனா படத்தை தயாரித்துள்ள சிவகார்த்திகேயன் படம் டிசம்பர் மாதம் திரைக்கு வரவுள்ளது என்று கூறியுள்ளார்.

தமிழ் சினிமாவில் முன்னணி நடிகர்களில் ஒருவராக இருப்பவர் நடிகர் சிவகார்த்திகேயன். நடிப்பைத் தொடர்ந்து பின்னணிப் பாடகராகவும் இருக்கிறார். இந்த நிலையில், நயன்தாரா நடிப்பில் உருவாகி வரும் கோலமாவு கோகிலா படத்தின் மூலம் பாடலாசிரியராகவும் உருவாகியுள்ளார்.

இதற்கிடையில் சொந்தமாக தனது பெயரில் புதிதாக தயாரிப்பு நிறுவனம் ஒன்றையும் தொடங்கியுள்ளார். அதாவது, சிவகார்த்திகேயன் புரோடக்‌ஷன்ஸ் என்ற பெயரில் தொடங்கப்பட்டுள்ள தயாரிப்பு நிறுவனத்தின் மூலம், அவரது நண்பரான அருண் ராஜா காமராஜ் இயக்கத்தில் உருவாகும் புதிய படத்தை தயாரிப்பதாக ஏற்கனவே அறிவித்திருந்தார்.

கனா: நண்பனுக்காக கனவை நினைவாக்கும் சிவகார்த்திகேயனின் புரோடக்ஷன்ஸ் நிறுவனம்!


அதன்படி கனா என்ற படத்தை தயாரித்து வருகிறார். இப்படத்தில் சத்யராஜ், சிவகார்த்திகேயன் மற்றும் ஐஸ்வர்யா ராஜேஷ் ஆகியோர் முன்னணி கதாபாத்திரங்களில் நடித்து வருகின்றனர்.

இப்படம் சாதிக்க துடிக்கும் மகளுக்கும், தந்தைக்கும் இடையிலான கதையைக் கொண்டுள்ளது. இதுதொடர்பாக கருத்து தெரிவித்துள்ள சிவகார்த்திகேயன், திரைத்துறை தான் எனக்கு பெயரும், புகழும் அளித்தது. இந்த துறைக்கு நான் நிறைய கடமைப்பட்டிருக்கிறேன்.

சாதிக்கும் கனவில் நாங்கள் சுற்றிய போது எல்லா நிலைகளிலும் என்னுடன் இருந்த, என் நண்பர்களின் கனவையும் புரிந்து கொள்வது என்பது எனது கடமை என்று குறிப்பிட்டிருந்தார். இந்த நிலையில், இப்படத்தின் புதிய போஸ்டர் ஒன்றை வெளியிட்டு, படம் டிசம்பர் மாதம் திரைக்கு வரவுள்ளது என்று தனது டுவிட்டர் பக்கத்தில் கூறியுள்ளார் என்பது குறிப்பிடத்தக்கது.