ஷூட்டிங் துவங்கும் முன்பே 'அருவா' படத்திற்கு வந்த சிக்கல்

ஹரி-சூர்யா இருவரும் ஆறாவது முறையாக இணையவுள்ள படம் அருவா. இந்த படம் பற்றிய அதிகாரபூர்வ அறிவிப்பை ஸ்டூடியோ கிரீன் நிறுவனம் சமீபத்தில் தான் வெளியிட்டிருந்தது.

ஏப்ரல் மாதம் துவங்கி ஷூட்டிங்கை ஒரே கட்டமாக நடத்தி முழுமையாக முடிக்க உள்ளதாகவும் அந்த அறிவிப்பில் தெரிவித்திருந்தனர்.

இது ஹரி ஸ்டைலில் கிராமத்து பின்னணியில் எடுக்கப்படும் மாஸான ஒரு ஆக்ஷன் படம் என்றும், அதில் சூர்யா இரண்டு ரோல்களில் நடிக்கிறார் என்றும் கூறப்படுகிறது.

இந்நிலையில் தற்போது ஷூட்டிங் துவங்கும் முன்பே இந்த படத்திற்கு ஒரு சிக்கல் வந்திருக்கிறது. ஹரி இந்த படத்திற்கு 'அருவா' என பெயரிட்டுள்ள நிலையில் அதே பெயரில் ஏற்கனவே ஒரு படம் உருவாகி ரிலீஸுக்கும் தயாராக உள்ளது.

பாடலாசிரியர் ஏகாதசி இயக்கியுள்ள இந்த படம் தியேட்டர்களில் ரிலீஸ் ஆகவில்லை என்றாலும் சில திரைப்பட விழாக்களில் திரையிடப்பட்டுள்ளது. சில விருதுகளையும் பெற்றுள்ளது அந்த படம்.

தற்போது அதே பெயரை சூர்யாவின் படத்திற்கு வைத்திருப்பது தான் சிக்கலுக்கு காரணம். இது பற்றி பேசிய ஏகாதசி தான் தலைப்பை விட்டுக்கொடுக்க போவதில்லை என உறுதியாக கூறியுள்ளார். அதனால் சூர்யா-ஹரி படத்திற்கு தலைப்பு மாற்றப்படுமா என்கிற கேள்வி எழுந்துள்ளது.

இது ஒருபுறமிருக்க இயக்குனர் சுதா கொங்கரா இயக்கத்தில் சூர்யா நடித்துள்ள சூரரை போற்று படம் ஏப்ரல் மாதத்தில் மாஸ்டர் படத்திற்கு போட்டியாக ரிலீஸ் ஆகவிருந்தது. தற்போது அது மே 1ம் தேதிக்கு தள்ளி வைக்கப் பட்டிருக்கிறது என செய்திகள் பரவி வருகிறது.