வருமான வரி செலுத்துவதில் ஆமிர்கானை மிஞ்சிய ஹ்ரித்திக் ரோஷன்

மும்பை: 'காபில்' நடிகர் ஹிரித்திக் ரோஷன் இந்த ஆண்டு முன்கூட்டியே வருமானவரி செலுத்தும் பாலிவுட்டில் நடிகர்களில் முதலிடம் பிடித்துள்ளார்.

பாலிவுட் வட்டாரத்தில் இருந்து கிடைத்த தகவலின்படி, கடந்த ஆண்டுடன் ஒப்பிடுகையில் ஹ்ரித்திக் ரோஷனின் வருமானம் 1500 சதவீத உயர்வை கண்டுள்ளது. கடந்த ஆண்டு இதே காலாண்டில், ரூ.50 கோடி செலுத்திய ஹ்ரித்திக் ரோஷன், தற்போது (டிசம்பர்-15 வரை) முன்கூட்டியே ரூ.80 கோடி வருமானவரியை செலுத்தியுள்ளார். இதன் மூலம் சக பாலிவுட் நடிகர்களை பின்னுக்குத்தள்ளி முதலிடம் பிடித்துள்ளார்.

இந்த வரிசையில், ஹிரித்திக் ரோஷனுக்கு அடுத்தபடியாக 'தங்கல்' நடிகர் ஆமிர்கான் முன்கூட்டியே ரூ.74 கோடி வருமான வரியை செலுத்தியுள்ளார். ஆமிர்கான் கடந்த ஆண்டு இதே நேரத்தில் ரூ.3.7 கோடி வருமானவரி செலுத்தினார்.

ரன்பீர் கபூர் நடிப்பில் வெளியான 'ஏ தில் ஹை முஷ்கில்' படம் பாக்ஸ் ஆபீசில் சக்கைப் போடு போட்ட நிலையில், முன்கூட்டியே செலுத்தும் வருமான வரியாக ரூ.37 கோடியை செலுத்தி பட்டியலில் மூன்றாம் இடத்தை வகிக்கிறார். ரன்பீர் கபூர், கடந்த செப்டம்பர் 2016 வரை ரூ.7.8 கோடி வருமான வரி செலுத்தினார்.

சல்மான் கான், கடந்த செப்டம்பர் மாதம் வரை முன்னணியில் இருந்த சல்மான் கான் தற்போது 4 வது இடத்துக்கு தள்ளப்பட்டுள்ளார். தற்போது ரூ.16 கோடி செலுத்தியுள்ள சல்மான், கடந்த ஆண்டு இதே நேரத்தில் ரூ.11கோடி வருமானவரி செலுத்தினார்.

கடந்த ஆண்டு செப்டம்பரில் ரூ.18 கோடி வரி கட்டி சல்மான் கானை விட முன்னணியில் இருந்த அக்ஷய்குமார், இந்த ஆண்டு ரூ.10 கோடி மட்டுமே செலுத்தி பட்டியலில் 5 வது இடத்துக்கு பின் தள்ளப்பட்டுள்ளார்.

அக்ஷய்குமாருக்கு அடுத்தபடியாக, 'பஜிராவோ மஸ்தானி' நாயகி தீபிகா படுகோன், ரூ.3 கோடி வருமான வரி செலுத்தியுள்ளார். கடந்த ஆண்டு ரூ.3.2 கோடி வரிக் கட்டியது குறிப்பிடத்தக்கது. தீபிகாவைத் தொடர்ந்து, கரீனா கபூர் கான் 7 வது இடத்தில் இருக்கிறார். இவர் இந்த ஆண்டு ரூ.70 லட்சம் வருமான வரி செலுத்தியுள்ளார்.