JK Rithesh: நல்ல தம்பியை நான் இழந்துவிட்டேன்: நடிகர் சங்கத் தலைவர் நாசர்!

நல்ல தம்பியை இழந்துவிட்டேன் என்றும், நடிகர் ஜேகே ரித்திஷின் திடீர் மரணம் அதிர்ச்சியளிக்கிறது என்றும் நடிகர் சங்கத் தலைவர் நாசர் தெரிவித்துள்ளார்.

நடிகரும், ராமநாதபுரம் மக்களவைத் தொகுதியின் முன்னாள் உறுப்பினரான ஜேகே ரித்திஷ் (46) மாரடைப்பால் மரணமடைந்துள்ளார். சின்னப்புள்ள படத்தின் மூலம் சினிமாவில் அறிமுகமான ஜேகே ரித்திஷ் அண்மையில், வெளியான எல்.கே.ஜி என்ற அரசியல் படத்தில் தனது நடிப்புத் திறமையை வெளிப்படுத்தினார். திரைப்பட தயாரிப்பாளர் சங்கம் மற்றும் நடிகர் சங்கத்தின் முனைப்புடன் இவர் செயல்பட்டு வந்தார்.

RIP JK Ritheesh: நடிகர் ஜே.கே. ரித்தீஷ் மாரடைப்பால் இன்று காலமானார்

2009ம் ஆண்டில் திமுக சார்பில் ராமநாதபுரம் மக்களவைத் தொகுதியில் போட்டியிட்டு வெற்றிப்பெற்றார். பிறகு 2014 திமுக-வில் இருந்து விலகி அதிமுக-வில் அவர் இணைந்தார். இந்த நிலையில், ராமநாதபுரம் பாஜக வேட்பாளர் நயினார் நாகேந்திரனை ஆதரித்து பரப்புரை பணிகளில் ஈடுபட்டு வந்தார். இந்த நிலையில், இன்று பிற்பகல், சாப்பிட்டு ஓய்வு எடுத்துக் கொண்டிருந்த போது, அவருக்கு திடீரென்று மாரடைப்பு ஏற்பட்டுள்ளது. இதையடுத்து, அருகிலுள்ள மருத்துவமனைக்கு சிகிச்சைக்காக அனுமதிக்கப்பட்டுள்ளார். எனினும், அவர் சிகிச்சை பலனின்றி உயிரிழந்தார்.



ஜேகே ரித்திஷின் இறப்பு குறித்து, நடிகர் சங்கத் தலைவர் நாசர் கூறுகையில், ஒரு நல்ல தம்பியை இழந்துவிட்டேன். எப்போது, அவரது ஆரோக்கியத்தில் அக்கறை கொண்டவர். ஜேகே ரித்திஷ் இறந்துவிட்டார் என்ற அதிர்ச்சியில் இருந்து மீளமுடியவில்லை என்று குறிப்பிட்டுள்ளார் என்பது குறிப்பிடத்தக்கது.

நாசரை தொடர்ந்து சினிமா பிரபலங்கள் பலரும், தங்களது இரங்கலை தெரிவித்து வருகின்றனர்.