உண்மையை பேசிய ஓவியாவை மட்டும் எனக்கு பிடிக்கும்: ரம்யா நம்பீசன்!

பிக்பாஸ் நிகழ்ச்சியில் உண்மையை பேசிய ஓவியாவை மட்டும் எனக்கு பிடிக்கும் என்று நடிகை ரம்யா நம்பீசன் தெரிவித்துள்ளார்.

கமல்ஹாசன் தொகுத்து வழங்கும் பிக்பாஸ் நிகழ்ச்சி நாளுக்கு நாள் ரசிகர்களின் வரபேற்பை அதிகப்படுத்தி வருகிறது. நடிகர் மற்றும் நடிகைகளும் பிக்பாஸ் நிகழ்ச்சி குறித்தும், அதன் போட்டியாளர்கள் குறித்தும் அவ்வப்போது கருத்து தெரிவித்து வருகின்றனர். 44 நாட்களை கடந்த நிலையில், இன்னும் 55 நாட்களை வீட்டுக்குள் இருக்கும் பிரபலங்கள் கடக்க வேண்டியுள்ளது. பிக்பாஸ் நிகழ்ச்சியிலிருந்து வெளியேறிய ஓவியாவின் வேக்-அப் டான்ஸைப் பார்க்காமல் அவரது ரசிகர்களுக்கு பொழுதே போகவில்லை என்று அவரது ரசிகர்கள் சமூக வலைதளங்களில் கருத்து தெரிவித்து வருகின்றனர்.

இந்நிலையில், பிக்பாஸ் ஓவியா தொடர்பாக, நடிகை ரம்யா நம்பீசன் கூறுகையில், படப்பிடிப்பில் பிஸியாக இருந்தாலும், பிக்பாஸ் நிகழ்ச்சியை நான் பார்ப்பேன். ஓவியாவை நான் இதுவரை பார்த்ததில்லை. அவருடன் போனில் பேசியதும் இல்லை. ஆனால், பிக்பாஸ் வீட்டில் அவர் வெளிப்படையாக இருந்தது எனக்கு ரொம்ப பிடித்திருந்தது. எப்போதும் உண்மையை மட்டும் பேசி வரும் குணம் எனக்கு பிடித்திருந்தது என்று தெரிவித்துள்ளார்.