அம்மாவான குமுதா: எடுத்தவுடனேயே 7 வயது பையனுக்கு அம்மா கதாபாத்திரம்!

இதற்குதானே ஆசைப்பட்டாய் பாலகுமாரா படத்தில் விஜய் சேதுபதியின் காதலியாக நடித்த ‘குமுதா நந்திதா தற்போது ஒரு படத்தில் 7 வயது பையனுக்கு அம்மாவாக நடிக்கிறார் என்ற தகவல் வெளியாகியுள்ளது.

இயக்குனர் பா.ரஞ்சித் இயக்கத்தில் கடந்த 2012ல் வெளியான அட்டகத்தி என்ற படத்தின் மூலம் அறிமுகமானவர் நடிகை நந்திதா. இப்படத்தைத் தொடர்ந்து சிவகார்த்திகேயனின் எதிர்நீச்சல், அஞ்சல, உப்புகருவாடு, புலி ஆகிய பல படங்களில் நடித்துள்ளார்.

ஆனால் இதில் எதிர்நீச்சல், அட்டகத்தி ஆகிய படங்களைத் தவிர எந்த படமும் நந்திதாவுக்கு சிறந்த படமாக அமையவில்லை. எனினும், விஜய் சேதுபதியுடன் இணைந்து இவர் நடித்த இதற்கு தானே ஆசைப்பட்டாய் பாலகுமாரா என்ற படம் சிறந்த படமாக அமைந்தது. அதுவும் குமுதா ஹேப்பி அண்ணாச்சி என்ற டயலாக் கச்சிதமாக அமைந்தது.

இதுவரை எந்தப் படத்திலும் அம்மாவாக நடிக்காததாலோ என்னவோ இவருக்கு அம்மாவாக நடிக்க வேண்டும் என்ற ஆசை வந்துள்ளது. இந்த நிலையில், தற்போது புதுமுக இயக்குனர் கீதா ராஜ்புட் இயக்கத்தில் புதிய படமொன்றில் கமிட்டாகியுள்ளார். அந்தப் படத்தில் 7 வயது பையனுக்கு அம்மாவாக நடிக்க இருக்கிறார். இதற்காக தனது உடல் எடையை குறைத்து வித்தியாசமாக நடிக்க இருக்கிறாராம். இப்படத்தில் விஜய் வசந்த், எம் எஸ் பாஸ்கர் போன்ற பிரபல நடிகர்கள் முக்கிய கதாபாத்திரத்தில் நடிக்கவிருக்கிறார்களாம்.