கமல்ஹாசன் மேக்கப்பில் திருத்தம் : ‘இந்தியன் 2’

பிரம்மாண்ட இயக்குனர் ஷங்கர் இயக்கத்தில் கமல்ஹாசன், அப்பா & மகன் என இரு வேடங்களில் நடித்து 1996ல் வெளியான படம் ‘இந்தியன்’. இந்தப் படம் அப்போதே வசூலை வாரி குவித்தது. இந்தப் படத்தில் சுகன்யா, கஸ்தூரி, மனிஷா கொய்ராலா, ஊர்மிளா, கவுண்டமணி, செந்தில், நாசர் உட்பட பலர் நடித்திருந்தனர்.

தற்போது இந்தப் படத்தின் இரண்டாம் பாகத்தை இயக்கி வருகிறார் இயக்குனர் ஷங்கர். இந்தப்படத்தில் கமல்ஹாசன் ஜோடியாக காஜல் அகர்வால் நடிக்கிறார். கமல்ஹாசன் பேரனாக நடிகர் சித்தார்த் நடிக்கிறார். மேலும் படத்தில் ஆர்.ஜே.பாலாஜியும் நடிக்கிறார்.

கடந்த மாதம் இந்தப் படத்தின் படப்பிடிப்பு சென்னையில் பூஜையுடன் தொடங்கியது. சில நாட்கள் படப்பிடிப்பு நடந்த நிலையில் கமல்ஹாசனின் வயதான தோற்றம் திருப்தியாக இல்லை என்று படப்பிடிப்பை நிறுத்திவிட்டார் ஷங்கர். மீண்டும் ஹாலிவுட் மேக்கப் கலைஞர்களை வைத்து அவரது தோற்றத்தை மாற்றி அமைத்துள்ளார். தற்போது கமலின் மேக்கப்பில் ஷங்கருக்கு திருப்தி ஏற்பட்டுள்ளது. இதனால் தற்போது இந்தப் படத்தின் படப்பிடிப்பை தொடங்கியுள்ளார் ஷங்கர்.

தற்போது கமல்ஹாசனும், காஜல்அகர்வாலும் நடிக்கும் காட்சிகள் படமாக்கப்பட்டு வருகிறது. தொடர்ந்து மூன்று மாதங்கள் இந்தப் படத்தின் படபிடிப்பு நடைபெறவுள்ளதாக கூறப்படுகிறது.