இருட்டு அறையில் முரட்டு குத்து 2க்கு இது தான் புது டைட்டில்?

தமிழ் சினிமாவில் அடல்ட் காமெடி படங்களுக்கு என்று நல்ல மார்க்கெட் உள்ளது. சந்தோஷ் பி ஜெயக்குமார் இயக்கிய 'இருட்டு அறையில் முரட்டு குத்து' படம் இளைஞர்களை அதிகம் கவர்ந்து பாக்ஸ் ஆபீஸில் நல்ல வரவேற்பை பெற்றது குறிப்பிடத்தக்கது.

இந்த படத்தின் இரண்டாம் பாகம் தற்போது உருவாகி வருகிறது. முதல் பாகத்தில் நடித்த கவுதம் கார்த்திக், யாஷிகா ஆனந்த், சந்திரிக்கா ரவி உள்ளிட்ட யாரும் இரண்டாம் பாகத்தில் நடிக்க போவதில்லை. புதிதாக நடிகர்கள் ஒப்பந்தம் செய்யப்பட்டு இருக்கிறார்கள். இருட்டு அறையில் முரட்டு குத்து படத்தை இயக்கிய சந்தோஷ் பி ஜெயக்குமார் தான் இரண்டாம் மாதத்தில் ஹீரோவாக நடிக்க உள்ளார்.

இரண்டாம் பாகத்தின் சூட்டிங் கடந்த வருடம் டிசம்பர் மாதம் துவங்கி விட்ட நிலையில் தற்போது இதற்கு "இரண்டாம் குத்து" என டைட்டில் வைத்து இருப்பதாக செய்தி பரவி வருகிறது.

ஹீரோயின்களாக கரிஷ்மா மற்றும் அக்ரிதி ஆகியோர் ஒப்பந்தம் செய்யப்பட்டு இருக்கிறார்கள். இவர்கள் இருவரும் மும்பையை சேர்ந்தவர்கள். மேலும் முக்கிய ரோல்களில் டேனி, மொட்ட ராஜேந்திரன், ரவி மரியா, சாம்ஸ், மனோ பாலா உள்ளிட்ட பலர் நடிக்கிறார்கள். இரண்டாம் குத்து படத்தின் முதற்கட்ட ஷூட்டிங் சென்னையில் நடத்தி விட்டு இரண்டாம் கட்ட படப்பிடிப்புக்காக பேங்காக் செல்ல படக்குழு திட்டமிட்டிருப்பதாக சந்தோஷ் பி ஜெயக்குமார் தெரிவித்திருந்தார். கொரோனா காரணமாக அந்தத் திட்டம் பாதிக்கப்பட்டு இருப்பதால், ஷூட்டிங் எங்கு நடக்கும் என்பதை பற்றிய தகவல் விரைவில் வெளிவரும் என எதிர்பார்க்கப்படுகிறது.

இருட்டு அறையில் முரட்டு குத்து படம் நல்ல வரவேற்பை பெற்றாலும் அதன் இரண்டாம் பாகத்தில் நடிக்க பல ஹீரோக்கள் தயக்கம் காட்டியதாக சந்தோஷ் பி ஜெயக்குமார் தெரிவித்திருக்கிறார். "இரண்டாம் பாகத்தில் நடிப்பதற்காக பல நடிகர்களை நான் அணுகினேன். அவர்கள் தங்களது இமேஜ் பாதிக்கப்படும் எனக் கூறி இந்த படத்தில் நடிக்க மறுத்துவிட்டனர், அதன் பிறகு நீயே இந்த படத்தில் ஹீரோவாக நடிக்கலாம் என்று சிலர் கூறினார்கள். அதற்கு பிறகு தான் இந்த முடிவு எடுத்தேன்" என் சந்தோஷ் பி ஜெயக்குமார் தெரிவித்திருக்கிறார்.

இருட்டு அறையில் முரட்டு குத்து படத்தில் ஒரு பெண் எப்படி virgin ஆண்களை வீட்டுக்குள் பிடித்து வைத்து அவர்களை கொடுமை படுத்துகிறது என்பது பற்றி காட்டியிருப்பார்கள். அது போல இரண்டாம் பாகத்தின் கதை என்னவாக இருக்கும் என்பது படத்தின் அப்டேட் அல்லது டீஸர் வெளியானால் தான் தெரியவரும்.