Petta Update: கார்த்திக் சுப்புராஜ் படத்தில் கைதியாக நடிக்கும் ரஜினிகாந்த்!!

கார்த்திக் சுப்புராஜ் இயக்கத்தில் உருவாகும் ‘பேட்ட’ படத்தில் நடிகர் ரஜினிகாந்த் கைதியாக நடித்துள்ளதாக தகவல் வெளியாகி உள்ளது.

நடிகர் ரஜினிகாந்த் நடிப்பில் அடுத்ததாக உருவாகி வரும் திரைப்படம் ‘பேட்ட’. இளம் இயக்குநர் கார்த்திக் சுப்புராஜ் இயக்கத்தில் உருவாகும் இப்படத்தை சன்பிக்சர்ஸ் நிறுவனம் தயாரித்து வருகிறது. இசையமைப்பாளர் அனிருத் இப்படத்திற்கு இசையமைக்கிறார். மிகப்பெரிய பொருட்செலவில் உருவாகும் இப்படத்தில் நடிகர் ரஜினியுடன் சிம்ரன், த்ரிஷா, பாபி சிம்ஹா, விஜய் சேதுபதி உள்ளிட்ட நடிகர்கள் நடித்து வருகின்றனர்.

இப்படத்தின் மோஷன் போஸ்டர் கடந்த சில வாரங்களுக்கு முன் வெளியாகி ரசிகர்கள் மத்தியில் நல்ல வரவேற்பைப் பெற்ற நிலையில், படம் குறித்த புதுத் தகவல் ஒன்று தற்போது வெளியாகி உள்ளது.

படத்தில் ரஜினி ஆசிரியராக நடிக்கிறார் எனவும், படம் 1980 ஆம் ஆண்டு காலக்கட்டத்தில் மையமாக கொண்டு எடுக்கப்படுவதாகவும் கூறப்பட்டு வந்த நிலையில், தற்போது அதில் ரஜினிகாந்த் கைதியாக நடிப்பதாக தகவல் வெளியாகி உள்ளது.

அதை உறுதிப்படுத்தும் வகையில், சமீபத்தில் வெளியான பேட்ட படத்தின் சூட்டிங் ஸ்பாட் படத்தில், ரஜினியின் கையில் மீசா 109 என்று பச்சைக் குத்தப்பட்டுள்ளது. இதனால், எமர்ஜென்சி காலக்கட்டத்தில் இருந்த மீசா சட்டத்தில் ரஜினி கைது செய்யப்பட்டிருப்பது போல் படத்தில் இருக்குமோ என ரசிகர்கள் ஆலோசிக்கின்றனர்.